Íslenski boltinn

Draumaendir Bjarka á ferlinum: „Loksins fann ég þjálfara sem virki­lega skildi mig“

Ingvi Þór Sæmundsson skrifar
Bjarki Gunnlaugsson lék tuttugu af 22 deildarleikjum FH sumarið 2012. Liðið vann deildina með þrettán stiga mun.
Bjarki Gunnlaugsson lék tuttugu af 22 deildarleikjum FH sumarið 2012. Liðið vann deildina með þrettán stiga mun.

Bjarki Gunnlaugsson þakkar Heimi Guðjónssyni öðrum fremur fyrir þann góða endi sem ferill hans fékk.

Í fjórða og síðasta þætti A&B, þáttaraðar um tvíburana Arnar og Bjarka, var meðal annars farið yfir síðasta tímabil Bjarka á ferlinum, með FH 2012.

Eftir að hafa verið mikið meiddur og spilað lítið árin á undan ákvað Bjarki að taka undirbúningstímabilið 2012 af krafti og það skilaði sér heldur betur.

Bjarki lék nánast alla leiki FH sem varð Íslandsmeistari með miklum yfirburðum. Hann vann þar með Íslandsmeistaratitilinn með þriðja liðinu en hann hafði áður unnið hann með ÍA og KR. 

„Árið 2012 erum við KR-ingar með frábært lið. Við unnum tvöfalt 2011 og það átti að keyra yfir deildina 2012. Á þessum tíma voru þetta KR og FH sem slógust meira og minna um titlana. Maður átti von á einhverju það ár en að Bjarki kæmi þarna inn, á miðjuna í FH-liðinu, í nýju hlutverki,“ sagði Bjarni Guðjónsson sem var fyrirliði KR á þessum tíma. Eins og hann segir var Bjarki í öðru hlutverki 2012 en hann hafði áður verið á ferlinum. Heimir, þjálfari FH, notaði hann nefnilega aftastan á miðjunni.

„Lykilinn að þessu fyrir mig var náttúrulega Heimir Guðjónsson. Loksins fann ég þjálfara sem virkilega skildi mig. Bjarki, þú ert bara miðjumaður. Og setti mig í hlutverk sem engum þjálfara hafði einhvern veginn dottið í hug að gera. Hann setti mig í stöðu varnartengiliðs,“ sagði Bjarki.

Klippa: A&B - Draumaendir Bjarka

Heimir segir að Bjarki hafi farið létt með þetta nýja hlutverk.

„Það sýnir bara hversu góður fótboltamaður hann var. Það var ekkert mál fyrir hann að fara þarna niður og spila og stjórna leik liðsins,“ sagði Heimir um Bjarka. Hann var staðráðinn í að enda ferilinn með stæl.

„Ég vildi bara klára þetta almennilega. Fá eitthvað jákvætt. Líka kannski að sýna börnunum mínum: Heyrðu, pabbi var alveg þokkalegur leikmaður,“ sagði Bjarki.

Innslagið úr A&B má sjá í spilaranum hér fyrir ofan.

Þáttaröðina A&B má finna í heild sinni á efnisveitunni Stöð 2+.


Tengdar fréttir

„Hvað eru menn búnir að láta fífla sig út í?“

Það er kannski skrýtið að hugsa til þess núna, tveimur Íslandsmeistaratitlum, fjórum bikarmeistaratitlum og einstöku Evrópuævintýri síðar, en þegar Arnar Gunnlaugsson var ráðinn þjálfari Víkings höfðu fáir trú á því að hann ætti eftir að ná langt með liðið.

Bjarki um gjaldþrotið: „Þú ert niðurlægður á ákveðinn hátt“

Bjarki Gunnlaugsson segir að það hafi verið högg þegar hann var úrskurðaður gjaldþrota. Ekkert annað hafi þó verið í stöðunni. Hann sagði nánasta samstarfsmanni sínum hjá umboðsskrifstofunni Total Football ekki frá gjaldþrotinu fyrr en eftir að fréttir af því birtust í fjölmiðlum.

„Jæja Heimir, þú verður að hjálpa mér að enda þetta vel“

Bjarki Gunnlaugsson vildi ljúka fótboltaferli sínum, ferli sem honum þótti sjálfum ekkert sérstakur, með sem allra bestum hætti og lagði allt í sölurnar fyrir sumarið 2012. Um þetta ræddi hann í þáttaröðinni A&B sem fjallar um Skagatvíburana Arnar og Bjarka.

Snéru heim eins og rokk­stjörnur og komust á súluna á Astró

„Þeir koma til baka þarna ‘95 eins og einhverjar rokkstjörnur.“ Þetta segir Rósant Birgisson um æskuvini sína, tvíburabræðurna Arnar og Bjarka Gunnlaugssyni, þegar ævintýraleg endurkoma þeirra í íslenska boltann og ekki síður kraftmikil endurkoma í íslenska dægurmenningu, árið 1995, var rifjuð upp í fyrsta þætti af A&B.




Fleiri fréttir

Sjá meira


×