Innlent

Býður upp á sögugöngu um svæðið sem hún vill vernda

Kristján Már Unnarsson skrifar
Þuríður Sigurðardóttir söngkona er fædd og uppalin í Laugarnesi. Fjær til vinstri má sjá hvernig garðurinn við nýju landfyllinguna girðir nú þegar fyrir útsýni út á sundin.
Þuríður Sigurðardóttir söngkona er fædd og uppalin í Laugarnesi. Fjær til vinstri má sjá hvernig garðurinn við nýju landfyllinguna girðir nú þegar fyrir útsýni út á sundin. Sigurjón Ólason

Þuríður Sigurðardóttir söngkona kallar eftir því að Laugarnes í Reykjavík verði friðlýst sem búsetu- og menningarlandslag. Hún býður upp á sögugöngu um Laugarnes klukkan þrjú á morgun, sunnudag, þar sem hún ætlar meðal annars að fjalla um þá kenningu að landnámsbær Ingólfs hafi verið í Laugarnesi.

Í fréttum Stöðvar 2 hittum við Þuríði í Laugarnesi. Hún er þar fædd og uppalin og bjó í Laugarnesbænum til nítján ára aldurs.

„Þetta var leiksvæðið og hér lærði maður að lesa fugla og blóm og náttúruna af því að við vorum úti allan daginn.“

Henni er umhugað um Laugarnes og fer fyrir undirskriftasöfnun á netinu um að það verði friðað.

„Að Laugarnesið verði friðlýst sem búsetu- og menningarlandslag. Að landslaginu verði ekki breytt og að fólk fái að njóta þess að hér er heilmikil saga.“

Ingólfur í Laugarnesi

Og vitnar í kenningu Árna Árnasonar um að hér hafi fyrsti landnámsmaðurinn búið. Nafnið Reykjavík sé enda dregið af víkinni þar sem heiti lækurinn úr Laugardal, Laugalækurinn, rann til sjávar, sem var á Kirkjusandi við Laugarnes.

Bæjarhóllinn þar sem Laugarnesbærinn stóð. Þar var æskuheimili Þuríðar.Sigurjón Ólason

„Manni finnst einhvern veginn eðlilegra að hann hafi búið á háum hól hér,“ og vísar til bæjarhólsins í Laugarnesi. Hann sé friðlýstur ásamt kirkjugarðinum sem sagður er sá elsti í Reykjavík. 

Og kirkja hafi verið komin löngu fyrr í Laugarnesi en í Kvosinni.

Hallgerður langbrók er sögð hafa búið í Laugarnesi, bæði áður en hún giftist Gunnari á Hlíðarenda og einnig eftir lát hans, og þar er hún sögð grafin. 

Jón Sigurðsson forseti tengist einnig Laugarnesi en hann bjó þar um þriggja ára skeið meðan hann var biskupsritari en Laugarnes var biskupssetur um tíma.

Sjá einnig: Landfyllingin sögð fara gegn verndaráætlun um Laugarnestanga

Landfyllingin umhverfisslys

Hún segir mikilvægt að komandi kynslóðir geti notið þess sem þó er eftir af óspjallaðri náttúru Laugarness.

Landfyllingin sem borgaryfirvöld og Faxaflóahafnir gerðu við Laugarnes.Sigurjón Ólason

„Fjaran hér, Norðurkotsvör, er eina óspjallaða fjaran á allri norðurströnd Reykjavíkur.“

Sjá einnig: Landfylling getur orðið góð viðbót við útivistarsvæðið í Laugarnesi

Og henni líst ekkert á áform ráðamanna Reykjavíkurborgar og Faxaflóahafna með nýrri landfyllingu sem gerð var án umhverfismats.

„Sem að okkur finnst herfilegt umhverfisslys. En landfyllingin er komin og það stendur jafnvel til að byggja á henni, og ef að það gerist þá hverfur útsýnið til Viðeyjar héðan frá Laugarnesi og alveg út að Skúlagötu.“

Útsýnið til Viðeyjar úr Laugarnesi. Sjá má vinnuvél á landfyllingunni. Þuríður óttast að byggt verði fyrir þetta útsýni.Sigurjón Ólason

Sögugangan á morgun hefst við við Listasafn Sigurjóns Ólafssonar á Laugarnestanga klukkan 15.

Reykjavík Skipulag Hafnarmál Borgarstjórn Menning Fornminjar Kirkjugarðar

Tengdar fréttir

„Laugarnesið hafði mjög mikil áhrif á mig í uppvexti“

Andrea Fanney Jónsdóttir textílhönnuður og klæðskerameistari opnaði síðustu helgi listasýninguna För þar sem öll prjónaverkin eru innblásin af fuglalífi borgarinnar. Sýningin er hluti af Prjónavetri í Listasafni Sigurjóns í Laugarnesi og er sú fyrsta í röð stuttra sýn­inga og við­burða vet­ur­inn 2024 til 25, þar sem ljósi er varpað á prjóna­hönn­un og stöðu ís­lensks prjóna­iðn­að­ar.

„Guð forði okkur frá því að verði byggt þarna“

Ný landfylling í Sundahöfn er mikið deilumál og eru íbúar í Laugarnesi ekki parsáttir við það að verið sé að bæta í fyllinguna þessa dagana. Áætlanir eru uppi um að nýjar höfuðstöðvar Faxaflóahafna rísi þar sem verið er að koma landfyllingunni niður og eru íbúar á svæðinu áhyggjufullir um að náttúru- og útsýnisspjöll fylgi þessari uppbyggingu.

Þar byggði Ingólfur - 1150 ár frá upphafi landnáms í Reykjarvík -

Sú hefð hefur myndast að miða upphaf landnáms norrænna manna á Íslandi við árið 874. Í ár eru því liðin 1150 ár frá upphafi landnáms þeirra. Ingólfur var fyrsti landnámsmaðurinn. Heimildir um föðurnafn hans eru misvísandi og misgóðar en um það, hvar hann setti höfuðból sitt niður, hefur skapast sú hefð að það hafi verið í Vík, jörðinni við Aðalstræti. Síðar var nafnið Reykjavík yfirfært á þá jörð.

Mest lesið


Fleiri fréttir

Sjá meira


×

Mest lesið