Hóta að standa í vegi „fal­legs“ frum­varps

Frumvarpið felur einnig í sér miklar fjárveitingar til landamæravörslu og varnarmála mikla hækkun skuldaþaksins svokallaða, svo eitthvað sé nefnt.

Óljóst er hvort næg samstaða um frumvarpið finnist innan Repúblikanaflokksins til að koma frumvarpinu gegnum báðar deildir þingsins. Repúblikanar eru þó að leggja frumvarpið fram með þeim hætti að það þurfi eingöngu meirihluta atkvæða í öldungadeildinni en ekki sextíu atkvæði eins og flest frumvörp.

Repúblikönum hefur gengið hægt að koma frumvörpum gegnum þingið á þessu kjörtímabili. Mikið púður hefur farið í innanflokksdeilur um fjárlög. Vonast er til þess að samþykkja frumvarpið í þremur nefndum seinna í dag.

Sjá einnig: Repúblikanar höfnuðu fjárlagafrumvarpi sem Trump studdi

Hundruðum milljarða dala yrði samkvæmt frumvarpinu varið í að klára að reisa múr á landamærum Bandaríkjanna og Mexíkó og í að þróa umfangsmikið og umdeilt eldflaugavarnarkerfi fyrir Bandaríkin. Þá yrðu skattalækkanir Trumps á fyrra kjörtímabili hans framlengdar og einnig skera verulega niður í sjúkratryggingakerfi Bandaríkjanna, Medicaid.

Þá yrði einnig stofnaður bankareikningur fyrir nýfædd börn með þúsund dala innstæðu. Þessir reikningar myndu á ensku heita „money account for growth and advancement“ eða „MAGA account“.

Þjórfé verður skattfrjáls og yfirvinna sömuleiðis.

Verði frumvarpið að lögum mun það að miklu leyti endurmóta alríkisyfirvöld Bandaríkjanna, samkvæmt frétt Washington Post.

Harðlínumenn innan flokksins eru ósáttir við hvað miðjumenn fengu miklu ágengt í viðræðunum um frumvarpið og vilja frekari niðurskurði. Þeir hafa heitið því að standa í vegi frumvarpsins verði ekki farið í meiri niðurskurð.

Einn þeirra er Chip Roy, frá Texas, sem segir að gera þurfi miklar breytingar á frumvarpinu svo hann styðji það. Politico segir að þeir gætu komið í veg fyrir samþykkt frumvarpsins.

Punchbowl News, sem sérhæfir sig í málefnum bandaríska þingsins, segir litla samstöðu innan flokksins um frumvarpið. Íhaldsmenn vilji meiri niðurskurð á Medicaid og öðrum sviðum. Það óttast aðrir í flokknum og svo eru þingmenn í ríkjum sem halla til vinstri sem eru ósáttir við lítinn persónuafslátt í frumvarpinu.

Mike Johnson, þingforseti, er enn og aftur í erfiðri stöðu, þar sem meirihluti Repúblikana í fulltrúadeildinni er mjög lítill. Ef fleiri en þrír þingmenn úr flokknum neita að greiða atkvæði með frumvarpinu verður það ekki samþykkt og hann vill leggja það fram strax í næstu viku.

Lengi hefur verið deilt um það innan flokksins hvort ná eigi fram þessum markmiðum með mörgum frumvörpum eða fáum. Trump hefur krafist þess að þetta verði gert í einu frumvarpi. Frumvarpið hefur í ljósi þess fengið nafnið: „HIÐ EINA, STÓRA, FALLEGA FRUMVARP“.

Áður en hann lagði af stað til Mið-Austurlanda birti Trump færslu á samfélagsmiðli sínum þar sem hann sagði Repúblikana nauðsynlega þurfa að standa saman. Demókratar vildu gera út af við Bandaríkin og það þyrfti að standa gegn því.

Þá sagði Trump að þegar hann sneri aftur myndi hann vinna með þingmönnum að því að leiða málið til lykta.

„Frumvarpið er FRÁBÆRT,“ skrifaði Trump.

„Við eigum engra kosta völ, VIÐ VERÐUM AÐ VINNA!“