Rafbyssu beitt þrisvar sinnum á fyrsta árs­fjórðungi

Þetta kemur fram í tilkynningu á vef lögreglunnar. Þar segir jafnframt að slíku vopni hafi verið beitt tvisvar sinnum á síðasta ársfjórðungi síðasta árs og að í þrettán tilvikum á sama tímabili hafi slíkt vopn verið dregið úr slíðri. Því er um að ræða tvöföldun á beitingu rafbyssu á milli ársfjórðunga.

Ríkislögreglustjóri birtir ársfjórðungsskýrslur yfir notkun á rafbyssum hjá lögreglu en þær voru teknar í gagnið sem valdbeitingartæki í september á síðasta ári. Fram kemur í tilkynningunni að rafbyssurnar séu á sama stigi í valdbeitingarstiganum og kylfa og varnarúði og að þær gefi lögreglu aukna möguleika á að velja þann varnarbúnað sem hæfir hverju verkefni.

Rafbyssu var beitt í fyrsta sinn af lögreglu í desember í fyrra og var það vegna vopnaðs einstaklings sem sýndi af sér ógnandi hegðun við Miklubraut.

Fram hefur komið í umfjöllun fréttastofu að sérstakur starfshópur á vegum dómsmálaráðuneytisins fari yfir öll atvik þar sem byssurnar eru teknar upp eða þeim beitt. Þá eru allir lögreglumenn sem bera rafbyssur með búkmyndavélar sem eru tengdar slíðrinu og taka sjálfvirkt upp öll tilfelli sem slík byssa er tekin úr slíðrinu. Upptökurnar eru svo nýttar við yfirferð.

„Um leið og vopnið er tekið úr slíðri þá kviknar sjálfkrafa á öllum myndavélum í ákveðnum radíus í kringum vopnið. Allir sem eru að bera þessar myndavéla sem tengjast vélunum. Þá fer upptaka í gang og allt sem sagt skráð og vistað. Þannig hvert og eitt einstaka mál er skoðað og ígrundað eftir notkun,“ sagði Guðmundur Ásgeirsson aðstoðaryfirlögregluþjónn hjá Mennta- og starfsþróunarsetri lögreglu í samtali við fréttastofu í desember.