Loka kaffi­skúrnum um­talaða við Leifs­stöð

Margir ráku upp stór augu þegar fram kom í fréttum fyrir rúmum mánuði síðan að skúrinn, sem áður var kaffiskúr leigubílstjóra, væri notaður sem bænahús múslima og lokaður öðrum en þeim sem nota hann sem slíkt. 

Íslenskum leigubílstjórum væri meinaður aðgangur að skúrnum og þeir kæmust ekki einu sinni á salernið þar.

Gerðu úttekt á húsnæðinu

Isavia sendi tilkynningu til leigubílstjóra fyrr í dag, þar sem fram kemur að tekin hafi verið ákvörðun um að gera breytingar á fyrirkomulagi aðstöðu fyrir bílstjóra sem veita leigubílaþjónustu samkvæmt skilmálum á flugvellinum.

Þar segir að í kjölfar umræðu um nýtingu á afrepinu hafi fyrirkomulag aðstöðunnar verið tekið til skoðunar. Fyrsta skrefið í þeirri vinnu hafi verið úttekt á húsnæðinu sem hafi leitt í ljós að ástand þess væri bágborið.

Því hafi verið tekin ákvörðun um að loka afdrepinu.

„Rétt er að það komi skýrt fram í þessum pósti að ástæða lokunarinnar er bágborið ástand afdrepsins sem ræðst einvörðungu af viðhaldsskorti sem við sem eigandi aðstöðunnar berum ábyrgð á.“

Leigubílstjórar noti salernisaðstöðu í flugstöð líkt og aðrir þjónustuaðilar

Aðstöðunni verði lokað þriðjudaginn næstkomandi, og þangað til geti bílstjórar farið og sótt persónulega muni sem þeir hafa geymt í skúrnum.

Í tilkynningunni segir að framvegis verði leigubílstjórum bent á að nýta salernisaðstöðu í flugstöðinni líkt og aðrir þjónustuaðilar á flugvellinum gerðu.

„Leigubílstjórar munu áfram hafa aðgang að mötuneyti í flugstöðinni sem er opið öllu starfsfólki á flugvallarsvæðinu. Þar er hægt að kaupa veitingar.“

Starfsmenn vallarins á vöktum við leigubílasvæðið

Í tilkynningunni er einnig vakin athygli á því að Isavia hafi borist ábendingar frá gestum flugvallarins um leigubílaþjónustu til og frá vellinum, sem hafi meðal annars snúið að ógagnsærri verðlagningu á leigubílaþjónustu.

Þess vegna sé hafin vinna við að tryggja betri umgjörð um þjónustu leigubíla á flugvellinum.

„Starfsfólk á vegum KEF er nú á vöktum á leigubílasvæðinu á háannatíma til að aðstoða gesti flugvallarins við að nýta sér þjónustu leigubíla og veita þeim upplýsingar um réttindi sín.“

„Þá er einnig hafin vinna við að finna leiðir til að auka gagnsæi í verðlagningu leigubílaþjónustu gagnvart gestum. Nánari upplýsingar verða veittar þegar þessum verkefnum vindur fram.“

Skúrinn hafi aldrei átt að verða varanlegt afdrep

Guðjón Helgason, upplýsingafulltrúi Isavia, segir í samtali við fréttastofu að skúrinn hafi aldrei átt að verða varanlegt afdrep leigubílstjóra. Leigubílstjórar séu auk þess einu þjónustuaðilarnir við Leifsstöð sem hafi haft sérstakt afdrep.

„Allir aðrir nýta sér salernisaðstöðuna í flugstöðinni.“

„Þessi skúr, sem er í rauninni geymsluskúr, það var boðið upp á hann sem afdrep ef þeir skyldu nota það. Síðan var ekki hugað að viðhaldi eftir þetta, og þegar umræðan fór af stað var farið í að skoða ástandið. Út frá þeirri skoðun var niðurstaðan sú að við ætlum að loka honum,“ segir Guðjón.