Þaggaði niður í þing­mönnum sem sögðu Krist­rúnu snúa út úr

Fjölmargir þingmenn beindu fyrirspurnum til Kristrúnar Frostadóttur forsætisráðherra í óundirbúnum fyrirspurnum á þinginu í morgun. Flestar snerust þær að máli hins kólumbíska Oscars Bocanegra og samheldni ríkisstjórnarinnar. 

Óskýr svör um strandveiðar?

Hildur Sverrisdóttir þingflokksformaður Sjálfstæðisflokksins spurði meðal annars út í misvísandi yfirlýsingar Hönnu Katrínar Friðriksson atvinnuvegaráðherra og Sigurjóns Þórðarsonar þingmanns Flokks fólksins um strandveiðifrumvarpið.

„Ráðherra kemur fram og segir að það þurfi að skoða hvort það þurfi að minnka leyfilegt magn á hverjum degi til að mæta fjölda daga. Hæstvirtur þingmaður, sem ráðherra var reyndar búinn að segja að myndi ekki hafa neina aðkomu að þessu máli, kemur fram og segir að um mistök ráðuneytisins sé að ræða,“ sagði Hildur og vísaði í greinargerð sem fylgdi frumvarpinu. 

Kristrún benti á að skýrt kæmi fram í frumvarpinu hvað í því fælist og sagði samheldni ríkisstjórnarinnar, eða meintan skort þar á, ekki vandamálið.

„Ég hef orðið fyrir vonbrigðum að það hefur verið hægagangur hérna í þinginu. Það jhefur ekki verið hægagangur hjá ríkisstjórninni. Við skiluðum 90 prósent þeirra mála sem voru á þingmálaskrá hér inn fyrir tilsettan tíma,“ sagði Kristrún. 

Hefur áhyggjur af framleiðni þingsins

Tveir dagar hafi farið í fyrstu umræðu um strandveiðifrumvarpið, ein vika í fyrstu umræðu um veiðigjöld og svo framvegis.

„Ég hef áhyggjur af vinnu og framleiðni þessa þings og í hvað við eyðum tíma. Fólk veit þetta laveg hér inni. Við vitum alveg af hverju þetta er. Látum ekki sem þetta sé eitthvað annað en það sem þetta er.“

Ingibjörg Davíðsdóttir, þingmaður Miðflokksins, spurði þá út í mál Oscars, sem Víðir Reynisson þingmaður Viðreisnar sagði yfirgnæfandi líkur á að fengi ríkisborgarrétt frá Alþingi, og hvort samstaða væri um það í ríkisstjórn.

„Það getur ekki talist eðlilegt að einstaklingar sem uppfylla ekki skilyrði til hælis og fá synjun um vernd frá tveimur stjórnsýslustigum geti leitað ásjár Alþingis og fengið vernd þannig með nánast loforði um veitingu ríkisborgararéttar,“ sagði Ingibjörg.

„Þessi ákvörðun kom ekki til umræðu í ríkisstjórn, það þarf ekki að vera samstaða eða óeining eða mismunandi skoðanir. Þetta varðar ekki ríkisstjórn,“ sagði Kristrún en á þessum tímapunkti kallaði Ingibjörg úr sal: „Ég spurði ekki að því.“

„Við skulum ekki láta eins og þetta sé nýtilkomið“

Frammíköll héldu áfram þegar Kristrún hélt máli sínu fram. Þegar Kristrún sagði ríkisborgararétt lengi hafa verið veittan með þessum hætti mátti heyra þingmann kalla úr sal: „Þetta er útúrsnúningur!“

Svo fór að Þórunn Sveinbjarnardóttir forseti Alþingis sló á bjölluna og sagði forsætisráðherra með orðið. Hún bað þingmenn þá að gefa hljóð.

„Ef fólk hér inni kemst að þeirri niðurstöðu eftir þetta vor að þetta sé afleitt, að ríkisborgararéttur sé veittur með þessum hætti þá þarf að taka ákvörðun um það í þessum sal. En það er hægt að fletta áraraðir aftur í tímann þar sem fólk er að taka mynd af sér með fólki, sem áður hefur fengið synjun á öðrum stigum, eftir að þeim hefur verið veittur ríkisborgararéttur hér inni. Við skulum ekki láta eins og þetta sé nýtilkomið. Höldum okkur við staðreyndir máls.“

Guðrún sat fyrir með Noorinu

Ein myndanna, sem Kristrún vísar til, er ljósmynd sem Guðrún Hafsteinsdóttir, núverandi formaður Sjálfstæðisflokksins og þá dómsmálaráðherra, og Birgir Þórarinsson þáverandi þingmaður tóku af sér með hinni afgönsku Noorinu, sem veittur var ríkisborgararéttur af Alþingi árið 2023. Noorina birti af sér mynd með þeim á Instagram, sem tekin var í Alþingishúsinu. 

Annað dæmi um slíka myndatöku er mynd sem Páll Magnússon, þáverandi formaður allsherjar- og menntamálanefndar, birti af sér með enska tónlistarmanninum Damon Albarn. Albarn lýsti yfir áhuga fyrir nokkrum árum að fá íslenskan ríkisborgararétt. Alþingi veitti honum ríkisborgararétt eftir heimsókn hans á þingið og fund með Páli, en það er allsherjar- og menntamálanefnd sem fer fyrir veitingu ríkisborgararéttar á þingi.