Mið­eind festir kaup á Snöru

Í tilkynningu þess efnis á vef Miðeindar segir að með kaupunum sameinist tvö lykilfyrirtæki á sviði íslenskrar máltækni og stafrænna tungumálalausna með það að markmiði að efla stöðu íslensku í stafrænum heimi.

Lyftistöng fyrir máltækni

„Kaup Miðeindar á Snöru eru gríðarleg lyftistöng fyrir íslenska máltækni. Sameiningin gerir okkur kleift að flétta saman gagnasöfn Snöru og tækni Miðeindar til þess að bæta notendaupplifun og auka fjölbreytni, en Miðeind hefur náð góðum árangri í að nota gervigreind til þess að auðga orðabókargögn og skapa nýjar málheildir. Gervigreind fleygir fram um þessar mundir og gæðagögn eru algjört lykilatriði í að tryggja stöðu íslenskunnar í þessari öflugu tækni,“ er haft eftir Lindu Heimisdóttur, framkvæmdastjóra Miðeindar.

Kaupin séu liður í langtímastefnu Miðeindar, sem snúi að því að efla íslenska máltækni og tryggja framtíð íslenskrar tungu í stafrænum heimi. Engar breytingar verði á þjónustu Snöru fyrst um sinn, en á næstu mánuðum verði unnið að samþættingu kerfa og framsetning vefbókasafnsins verði uppfærð í kjölfarið í takt við nýjustu tækni og þarfir notenda.

Vilja gera íslensku aðgengilega og nothæfa í stafrænu samhengi

Í tilkynningu segir Miðeind, sem hafi verið stofnuð árið 2015, sé leiðandi hugbúnaðarfyrirtæki á sviði máltækni og gervigreindar, með áherslu á íslenskt mál. Frá upphafi hafi stefna og tilgangur Miðeindar verið að þróa tæknilausnir sem geri íslensku aðgengilega og nothæfa í stafrænu samhengi. 

Ein helsta þjónusta Miðeindar sé Málstaður, opin veflausn sem sameini máltæknilausnir fyrirtækisins í einu notendavænu viðmóti. Undir Málstað séu fjórar lykilvörur: Málfríður, sem aðstoði við ritun og málfarsleiðréttingu, Hreimur, sem umbreyti töluðu máli í texta, Erlendur, vélþýðingarlausn sem styðji mörg tungumál, og Svarkur, sem sé spurningasvörunar- og leitarlausn. Þá haldi Miðeind úti stafrænni samheitaorðabók á vefnum samheiti.is en orðabókin hafi verið búin til með hjálp gervigreindar.

Snara sé frumkvöðull í miðlun stafrænna orðabóka fyrir íslenskt málumhverfi. Í vefgátt fyrirtækisins geti notendur fengið aðgang að víðtæku úrvali orðabóka og málheilda á íslensku og erlendum málum. 

„Krúnudjásn Snöru eru án efa Íslensk orðabók Menningarsjóðs og Ensk-íslensk orðabók með alfræðiívafi Þá má finna á Snöru orðstöðulykil úr verkum Halldórs Laxness, íslensk-ítalska og íslensk-spænska orðabók og úrval mataruppskrifta, svo fátt eitt sé nefnt.“