For­est vill niður­stöðu í mál Palace

Ernirnir í Palace tryggðu sér sæti í Evrópudeildinni með sigri í ensku bikarkeppninni á yfirstandandi leiktíð. Sætið er hins vegar í hættu þar sem John Textor, sem á 43 prósent hlut í Palace, á einnig 77 prósent hlut í franska liðinu Lyon.

Franska félagið tekur einnig þátt í Evrópudeildinni á komandi leiktíð en reglur UEFA segja að sami eigandi megi ekki eiga hlut í tveimur félögum innan sömu keppni. Verði dæmt í málinu er ljóst að Palace myndi missa sæti sitt þar sem liðið endaði í 12. sæti ensku úrvalsdeildarinnar á meðan Lyon endaði í 6. sæti í Frakklandi.

Forest, sem var lengi vel í baráttu um Meistaradeildarsæti, mun spila í Sambandsdeild Evrópu á komandi leiktíð. Fari hins vegar svo að Palace yrði sparkað úr Evrópudeildinni myndi Forest taka sæti þeirra.

Breska ríkisútvarpið greinir frá því að Forest hafi beðið UEFA um svör svo félagið viti sem fyrst hvort það sé að undirbúa sig undir tímabil í Evrópu- eða Sambandsdeildinni.

Breska ríkisútvarpið hafði samband við bæði UEFA og Palace vegna málsins en fékk engin svör.