Lyfjaeftirlitið vill stoppa Steraleikana

Til stendur að halda Steraleikana í Las Vegas á næsta ári og þau tíðindi hittu ekki beint í mark hjá WADA.

„Við munum hvetja stjórnvöld í Bandaríkjunum að finna löglegar leiðir til þess að stöðva þennan viðburð,“ sagði Witold Banka, forseti WADA.

„Þessir leikar eiga að dásama notkun hættulegra lyfja. Þetta verður að stöðva með heilsu íþróttamannanna í huga og líka af því við viljum hafa okkar íþróttir heiðarlegar.“

Eins og nafnið gefur til kynna þá mega íþróttamenn á mótinu nota öll þau ólöglegu efni sem þeim sýnist. Það sem meira er þá er hægt að vinna eina milljón dollara í bónus ef íþróttamönnunum tekst að slá heimsmet.