Meiri­hlutinn spari mínútur til að kasta klukku­tímum á glæ

Fullmannað var á fundi atvinnuveganefndar í morgun þrátt fyrir að Jón Gunnarsson, þingmaður Sjálfstæðisflokksins og nefndarmaður, hafi hótað því að minnihlutinn myndi sniðganga fundinn. Hann sakaði ríkisstjórnina jafnframt um ráðherraræði í gærkvöldi. 

Frumvarp um veiðigjald var afgreitt úr nefndinni en það var eina málið á dagskrá. Önnur umræða frumvarpsins hefjist á allra næstu dögum.

Menn mættu í vinnuna og breytingar gerðar á frumvarpi

Sigurjón Þórðarson, formaður nefndarinnar, segir fundinn hafa gengið óvenju vel.

Hvernig blasa orð Jóns frá því í gær um að minnihlutinn ætlaði ekki að mæta við þér?

Ég held að það hafi bara verið eitthvað upphlaup til að skapa einhverja umræðu en síðan held ég að menn hafi bara séð að sér. Þetta eru nú ekki góð skilaboð út í samfélagið. Að ef menn fá ekki að ráða öllu eins og áður þá ætli menn bara ekkert að mæta í vinnuna.

Ekki var tekið tillit til breytingatillagna minnihlutans en Sigurjón segir þó nokkrar breytingar hafa orðið á frumvarpinu við meðferð í nefnd.

„Þeir settu fram bókun á fundinum sem var nokkuð harðorð en við erum bara ánægðir með þá vinnu sem fram fór. Það var komið til móts við í enn frekara mæli við smærri útgerðir til að þetta frumvarp verði ekki tilefni til samþjöppunar. Síðan var komið til móts við gjald vegna makríls,“ sagði Sigurjón og mun því veiðigjald af makríl hækka minn en var lagt upp með. 

Jafnframt var afsláttur fyrir þorsk og ýsu af fyrstu veiddu tonnum aukinn fyrir útgerðirnar.

Spenna í loftinu og dauf eyru

Bergþór Ólason, þingmaður Miðflokksins og nefndarmaður, segir dálitla spennu hafa einkennt andrúmsloftið í morgun.

„Þarna auðvitað kom á daginn það sem ráðherra flokksins hafði flaggað að málamiðlanir á milli meirihluta og minnihluta væru ekki í boði. Málið var rifið út úr nefndinni og ljóst að það á að koma því til umræðu sem allra fyrst.“

Minnihlutinn hafi ákveðið að mæta þegar þeir höfðu haft færi til að kynna sér nefndarálitið. Hann segir það ámælisvert að ljúka málinu í nefnd án þess að fá fullnægjandi álit frá Skattinum og Byggðastofnun.

„Ég held að allir tali meira en minna fyrir daufum eyrum fyrir stjórnarliðum. Það til dæmis að verða ekki við þessum einföldu óskum um gestakomur lykilaðila. Það auðvitað lengir umræðuna í þingsal. Ég held að þarna hafi stjórnarmeirihlutinn sparað mínútur en kastað klukkustundum.“