Neyddur í legg­hlífar í Garða­bæ en losaði sig strax við þær

Þetta mátti sjá í beinni útsendingu frá leiknum á Sýn Sport um helgina, eins og sjá má í spilaranum hér að neðan.

Það er enn skýrt í Knattspyrnulögunum frá IFAB að legghlífar séu hluti af skyldubúnaði leikmanna. Þær skuli gerðar úr hentugu efni og vera nógu stórar til að veita hæfilega vernd en vera huldar algjörlega með sokkunum. Í reglunum segir jafnframt að leikmenn beri sjálfir ábyrgð á stærð og gæðum legghlífa sinna.

Klippir pappaglös og notar í stað legghlífa

Ljóst er að fótboltamenn víða um heim eru óánægðir með þessa reglu og þörfin fyrir hana sjálfsagt ekki eins aðkallandi og þegar hún var tekin í gildi, enda taka dómarar harðar á grófum tæklingum nú. Legghlífar hafa af þessum sökum orðið sífellt minni.

Sjálfur vill Þorri helst ekki nota legghlífar en fjórði dómari vildi ekki sleppa honum við það á laugardagskvöld, þegar Þorri kom óvænt inn á vegna meiðsla Kjartans Más Kjartanssonar.

„Ég klippi alltaf pappaglös og nota sem legghlífar en hann bannaði mér að fara inná þannig og sagði mér að sækja alvöru legghlífar,“ sagði Þorri sem fékk þá legghlífar lánaðar, tróð þeim inn á sokkana en henti þeim svo strax út fyrir hliðarlínu.

„Ég fékk svo gefins G Form legghlífar eftir þetta þannig að það var bara flott,“ sagði Þorri léttur í samtali við Vísi.