Ætlaði að myrða tvo þing­menn til við­bótar

Tilkynnt var í dag að Boelter, sem er 57 ára gamall, hefur verið ákærður fyrir alríkisbrot eins og morð og aðra glæpi og er það til viðbótar við ákærur saksóknara í Minnesota. Verði hann fundinn sekur fyrir alríkisbrotin stendur Boelter frammi fyrir dauðadómi, samkvæmt AP fréttaveitunni.

Saksóknarar opinberuðu einnig í dag að Boelter hafi ætlað sér að myrða tvo Demókrata til viðbótar. Ekki var þó gefið upp um hvaða Demókrata væri að ræða en ein þingkona segir að henni hafi verið sagt að maðurinn hafi lagt bíl sínum nærri heimili hennar en að skjót viðbrögð lögreglu hafi bjargað lífi hennar.

Fór á fjóra staði

Aðfaranótt laugardags fór Boelter, dulbúinn sem lögregluþjónn, heim til þingmannsins John A. Hoffman og skaut hann og eiginkonu hans Yvette. Bæði lifðu þó af en eru þungt haldin á sjúkrahúsi.

Í gögnum lögreglu segir að hann hafi bankað og kallað: „Þetta er lögreglan“. Hjónin sáu þó að hann var með grímu og reyndi Hoffman að ýta honum út um dyrnar. Þá skaut Boelter hann og eiginkonu hans bæði margsinnis og flúði af vettvangi.

Dóttir þeirra hringdi á lögregluna.

Því næst fór Boelter heim til annars Demókrata en sá var ekki heima. Þá fór hann til enn eins embættismannsins en þurfti frá að hverfa vegna lögregluþjóna sem voru á ferðinni, vegna banatilræðisins gegn Hoffman.

Eftir það fór hann heim til Melissu Horman, ríkisþingmann Demókrata, og skaut hana og eiginmann hennar til bana. Þegar lögregluþjóna bar að garði sáu þeir Boelter skjóta Mark Hortman inn um opnar dyr á húsi þeirra.

Lögregluþjónarnir skiptust á skotum við Boelter og flúið hann inn í húsið. Þar inni fundu lögregluþjónar svo Melissu Hortman látna og Boelter hafði einnig skotið hund þeirra hjóna.

Boelter flúði af vettvangi en var handtekinn seint um sunnudagskvöld.

Ekkert skýrt tilefni

Boelter átti nokkrar stílabækur sem hann hafði notað til að skipuleggja ódæði sín og virðist sem undirbúningurinn hafi staðið yfir um nokkurra mánaða skeið. Hins vegar segja saksóknarar að meðal skrifa hans megi ekki finna skýrt tilefni fyrir morðum hans og morðtilraunum.

Listi með nöfnum tuga manna, þar á meðal annarra þingmanna demókrata, baráttufólks fyrir réttindum kvenna til þungunarrofs og heilbrigðisstarfsmanna, fannst í bifreið hans. Báðir þingmennirnir sem hann skaut voru stuðningsmenn þungunarrofsréttinda.

Áður og eftir hann hóf ódæði sín senti Boelter skilaboð til vina og fjölskyldu sinnar þar sem hann gaf til kynna að hann myndi deyja.

Í einum slíkum skilaboðum sem hann sendi til fjölskyldu sinnar eftir að hann skaut þingkonuna og mann hennar til bana skrifaði hann: „Pabbi fór í stríð í nótt.“ Þá sagðist hann ekki vilja skrifa meira svo hann kæmi engum í vandræði.

Þá mun hann, samkvæmt lögreglunni, hafa sent skilaboð á eiginkonu sína þar sem hann baðst afsökunar og sagði að „vopnaðir og skotglaðir“ menn myndu koma heim til þeirra og þau ættu að fara úr húsinu.

Lögregluþjónar fundu eiginkonu hans og börn síðar í bíl. Hún var með tvær skammbyssur, um tíu þúsund dali í reiðufé og vegabréf barnanna með sér.