Íslenski boltinn

Stjarnan stað­festir komu Caulker

Sindri Sverrisson skrifar
Steven Caulker er mættur í Stjörnubúninginn.
Steven Caulker er mættur í Stjörnubúninginn. Stjarnan

Steven Caulker, fyrrverandi leikmaður í ensku úrvalsdeildinni í fótbolta, er orðinn leikmaður Stjörnunnar í Bestu deildinni.

Stjarnan staðfesti komu Caulkers með myndbandi í dag. Samkvæmt upplýsingum Vísis verður hann ekki bara leikmaður Stjörnunnar heldur einnig hluti af þjálfarateymi liðsins.

Þessi 33 ára gamli miðvörður á að baki einn A-landsleik fyrir England en hefur frá 2022 spilað 18 leiki fyrir Síerra Leóne.

Vistaskiptin hafa lengi legið í loftinu en Caulker var á meðal áhorfenda þegar Stjarnan mætti KR í Garðabænum í lok maí.

Caulker hóf meistaraflokksferil sinn með Tottenham Hotspur. Hann spilaði síðan fyrir Cardiff City, Queens Park Rangers og einnig nokkra leiki með Liverpool á láni. Frá 2019 hefur hann meira og minna spilað í Tyrklandi, síðast með Ankara Keçiörengücü á síðustu leiktíð.

Ljóst er að Caulker verður einn þekktasti leikmaður sem spilað hefur í íslenska boltanum, þegar hann verður gjaldgengur um miðjan júlí en félagaskiptaglugginn opnast 17. júlí.

Stjörnumenn sitja í 4. sæti Bestu deildarinnar með 20 stig, sex stigum á eftir toppliði Víkings, eftir 12 umferðir.

Besta deild karla Stjarnan

Mest lesið


Fleiri fréttir

Sjá meira


×

Mest lesið