Mikael orðinn leikmaður Djurgården

Mikael mætti til Stokkhólms í gær og var gómaður af papparössum á Arlanda flugvellinum, gekkst undir læknisskoðun og skrifaði undir samning til ársins 2029. Hann var svo kynntur á samfélagsmiðlum Djurgården rétt áðan, en fær ekki leikheimild fyrr en félagaskiptaglugginn í Svíþjóð opnar þann 8. júlí. 

Mikael hefur verið lykilleikmaður í Árósum undanfarin ár, alls spilað 121 leik fyrir AGF, skorað 18 mörk og lagt upp jafnmörg. Þar áður var hann hjá Midtjylland og Vendsyssel í Danmörku og Excelsior Rotterdam í Niðurlöndum.

Samkvæmt upplýsingum sænska miðilsins Expressen var Mikael keyptur frá AGF fyrir rúmar tvær milljónir evra, eða um 285 milljónir íslenskra króna.