Olivier Giroud verður liðsfélagi Hákonar

Giroud átti sex mánuði eftir af samning sínum við MLS félagið en hann hefur ekki fundið sig í Kaliforníu.

Hann ætlar nú að koma heim í frönsku deildina þrettán árum eftir að hann yfirgaf hana og samdi við Arsenal. Hann lék síðast með Montpellier tímabilið 2011–2012.

Giroud er á leiðinni til Lille og verður því liðsfélagi Hákonar Arnar Haraldssonar.

Giroud lék sinn síðasta leik með Los Angeles FC á sunnudaginn var og mun skrifa undir samning í Frakklandi í næstu viku.

Hann verður 39 ára gamall í september en skrifar væntanlega undir tveggja ára samning við Lille.

Lille endaði í fimmta sæti í frönsku deildinni og mun taka þátt í Evrópudeildinni á næsta tímabili.

Giroud kemur í staðinn fyrir Jonathan David sem fór á frjálsri sölu eftir tímabilið.

Giroud skoraði aðeins 5 mörk í 37 leikjum með Los Angeles FC.