Stjórnar­and­staða setji ný við­mið á þingi sem ógni lýð­ræðinu

Bryndís Haraldsdóttir, þingkona Sjálfstæðisflokksins, viðurkenndi í Reykjavík síðdegis í dag að um málþóf væri að ræða. Það gerði hún í tengslum við grein sem hún skrifaði árið 2019 þegar umræður fóru fram á þingi um þriðja orkupakkann.

Þá sat Sjálfstæðisflokkur í ríkisstjórn. Umræðan var í heildina 146 klukkustundir og er sú lengsta í sögu þingsins. Þar á eftir er umræða um Icesave sem var 135 klukkustundir og umræðan um veiðigjöldin var orðin 126 klukkustundir klukkan tíu í morgun og er því að nálgast það að verða sú lengsta.

Sjá einnig: Bryndís gengst við málþófinu

„Ég held það séu mjög fáir í dag sem myndu vilja sjá eftir einum einasta klukkutíma af umræðunni sem átti sér stað í tengslum við Icesave. Þetta veiðigjaldamál er að kollvarpa því kerfi sem við höfum haft og gengið svo vel til að auka hagsæld og verðmætasköpun í samfélaginu. Það er meingallað og í raun algjörlega útilokað að málið gangi fram og verði klárað með þeim hætti sem það liggur núna,“ segir Bergþór Ólason, þingflokksformaður Miðflokksins, í kvöldfréttum Sýnar.

Hann segir nóg eftir af umræðunni enn en hún stendur enn yfir þegar þessi frétt er skrifuð.

Taki lýðræðið í gíslingu

Ásthildur Lóa Þórsdóttir, þingkona Flokkur fólksins, sagði í dag að aldrei hefði verið jafn erfitt að semja um þinglok. Hún segist ekki vongóð um að samningar muni nást. Þegar stjórnarandstaðan tali um að semja sé hún bara að meina að stjórnin eigi að gera eins og þau vilji.

„Þessi stjórnarandstaða er að setja ný viðmið, hún er búin að taka lýðræðið í gíslingu, hún ber enga virðingu fyrir úrslitum kosninga, fyrir vilja þjóðarinnar, fyrir meirihluta Alþingis eða neinu öðru. Þetta er bara mjög hættulega þróun,“ segir Ásthildur Lóa en einnig var rætt við hana í kvöldfréttum Sýnar.

Hún segir að ef þessu verði leyft að gerast svona og þetta verði viðmiðið sé það stórhættulegt lýðræðinu í landinu.

Bergþór segir enn samræður meðal þingflokksformanna um þinglok. Samræðurnar mjakist og það séu góð samtöl í gangi, stöðugt frá fimmtudagskvöldi.

„Það er ákveðið hökt núna en það hefur verið mikill samningsvilji hjá okkur í stjórnarandstöðunni,“ segir hann og að lagðar hafi verið fram lausnir í umdeildustu málunum sem stjórnarandstaðan telji skynsamlegar. Hann segist bjartsýnn að hægt verði að hnýta þetta saman en að menn verði að mætast á miðri leið.

Mynd Ásthildar Lóu ekki skýr

Hann segir Ásthildi Lóu ekki inni í þessum samtölum og að hennar mynd sé ekki alveg skýr.

„Ég reikna með að þessi jákvæðu samtöl haldi áfram.“ 

Eins og stendur heldur umræðan áfram um veiðigjöld á þinginu. Þing hófst klukkan tíu í morgun. Tekið var hlé um klukkan 16 í klukkustund. Þegar fréttin er birt eru enn nokkrir á mælendaskrá og því ljóst að umræðan mun halda eitthvað áfram.