Fagna átta­tíu ára af­mæli milli­landa­flugs Ís­lendinga

Í tilkynningu Glasgow-flugvallar kemur fram að Icelandair og flugvöllurinn hafi til hátíðarbrigða staðið fyrir ýmsum uppákomum. Farþegum hafi verið boðið upp á köku og þeir leystir út með gjöf. Þá bjóði Icelandair upp á sérstakan 80 punda afslátt af Saga Premium-farmiðum.

Það var þann 11. júlí árið 1945 sem Catalina-flugbátur Flugfélags Íslands tók á loft frá Reykjavík, fyrsta farþegaflugvélin á leið í millilandaflug á vegum íslensks flugfélags. Áfangastaðurinn var Largs-flói vestur af Glasgow.

Fjórir Íslendingar skipuðu áhöfn flugbátsins. Flugstjóri var Jóhannes R. Snorrason og aðstoðarflugmaður Smári Karlsson. Sigurður Ingólfsson var flugvélstjóri og Jóhann Gíslason loftskeytamaður.

Farþegar voru fjórir, þar af þrír íslenskir heildsalar á leið til Bretlands í leit að nýjum viðskiptatækifærum, stór­kaup­menn­irn­ir Hans Þórðar­son, Jón Jó­hann­es­son og Jón Ein­ars­son, en fjórði farþeginn var séra Ró­bert Jack. Einnig voru tveir breskir hermenn með um borð að kröfu breskra hernaðar­yf­ir­valda.

Flogið var í sjöþúsund feta hæð og tók flugið sex klukkustundir og fjórar mínútur. Til samanburðar nefnir Icelandair að flugferðin núna milli Keflavíkur og Glasgow taki um tvær og hálfa klukkustund.

Í lýsingu af flugferðinni segir að þegar flug­vél­in var lent hafi farþegar staðið upp og hrópað fer­falt húrra fyr­ir flug­mönn­un­um. Morg­un­inn eftir hafi flug­vél­in snúið aft­ur til Íslands og lenti á Skerjaf­irði við Reykja­vík sex tímum síðar. Eng­ir farþegar hafi verið til Íslands.

Flug­stjór­inn, Jó­hann­es R. Snorra­son, sagði síðar frá: „Okk­ur var mjög vin­sam­lega tekið í Largs og fyr­ir­menn bæj­ar­ins buðu okk­ur til tedrykkju á fögr­um stað og spurðu margra spurn­inga um Flug­fé­lagið og þjóðina, sem hafði hafið milli­landa­flug, meðan þjóðir Evr­ópu voru enn að sleikja sár sín eft­ir ófriðinn“.

Á þessum áttatíu árum hefur millilandaflugi Íslendinga aldeilis vaxið fiskur um hrygg, eins og fjallað er um hér:

Flugstarfsemi hefur á þessum áratugum orðið einn af þýðingarmestu þáttum efnahagslífsins, eins og fræðast má um í þáttaröðinni Flugþjóðinni:

Icelandair-fólk hefur aðra ástæðu til að fagna þessa dagana. Í mánaðarlegu yfirliti flugtölfræðiveitunnar Cirium kemur fram að Icelandair hafi verið stundvísasta flugfélag Evrópu í júnímánuði. Danska flugfréttasíðan Check-in segir að Icelandair hafi þar með komið í veg fyrir að SAS hampaði þeim titli þriðja mánuðinn í röð.