Sleðinn úr Citizen Kane orðinn næstverðmætasti leikmunurinn

Sólrún Dögg Jósefsdóttir skrifar 18. júlí 2025 09:26

Sleðinn Rosebud leikur lykilhlutverk í Citizen Kane, sem kom út árið 1941. Getty/Michael Buckner

Sleðinn Rosebud úr verðlaunamyndinni Citizen Kane frá 1941 seldist fyrir 14,75 milljarða Bandaríkjadala á uppboði á dögunum, eða tæplega 1,8 milljarða króna. Hann er þar með orðinn næstdýrasti leikmunur úr kvikmynd sem selst hefur á uppboði.

Kaupandi sleðans er óþekktur en seljandinn er leikstjórinn Joe Dante, sem fékk gripinn að gjöf við gerð kvikmyndarinnar Explorers on the Paramount lot, sem kom út árið 1984.

„Maður út tökuliðinu sem vissi að ég væri hrifinn af gömlum kvikmyndum kom til mín með viðarleikmun í hönd og sagði: Það er verið að henda fullt af dóti hérna, kannski að þig langi í þennan,“ hefur Guardian eftir Dante.

„Ég er ekki viss um að hann hafi vitað hvaða sleði þetta var. En hann hlýtur að hafa fengið einhvers konar hugboð, af hverju hefði hann annars spurt mig?“

Sleðinn er einn af nokkrum sem voru framleiddir fyrir gerð myndarinnar en ekki liggur fyrir hversu margir sleðar léku hlutverk Rosebud.

Samkvæmt upplýsingum frá uppboðhúsinu keypti leikstjórinn Steven Spielberg einn sleðanna á uppboði árið 1982 fyrir rúmar sjö milljónir króna. Fjórtán árum síðar seldist annar sleði á uppboði fyrir 28 milljónir króna en sá kaupandi er óþekktur.

Sem fyrr segir er sleðinn næstverðmætasti leikmunur sem seldur hefur verið á uppboði svo vitað sé. Rúbínrauðu skór Dóróteu sem Judy Garland klæddist í Galdrakarlinum í Oz seldust á uppboði í Dallas í fyrra fyrir 28 milljónir Bandaríkjadala, um 3,875 milljarða íslenskra króna.

Bíó og sjónvarp Hollywood