Malkovich klipptur út úr Hinum fjóru fræknu

Magnús Jochum Pálsson skrifar 18. júlí 2025 14:46

Áhorfendur sem fara á The Fantastic Four: The First Steps munu ekki fá að sjá Malkovich í hlutverki hins rússneska Ivan Kragoff

John Malkovich mun ekki bregða fyrir í nýjustu mynd Marvel um hin fjögur fræknu þar sem karakterinn Ivan Kragoff, sem gengur undir nafninu Rauði draugur, hefur verið klipptur út úr myndinni.

Senur Malkovich áttu að koma snemma í The Fantastic Four: First Steps sem hluti af lengri runu um upphafsár ofurhetjukvartettsins þar sem þau berjast meðal annars við sovéska illmennið Rauða draug og hans þrjá Ofur-apa.

Ástæðan fyrir því að Malkovich hefur verið klipptur út ku vera til að gefa söguhetjunum fjórum, Reed Richards (Pedro Pascal), Sue Storm (Vanessa Kirby), Johnny Storm (Joseph Quinn) og Ben Grimm (Ebon Moss-Bachrach), meira pláss.

Myndin fjallar um það þegar Sue og Reed eignast sitt fyrsta barn en þurfa um leið að byrjast við plánetuætuna Galactus (Ralph Ineson) sem ógnar lífi á jörðinni.

Mynd úr teiknimyndasögunum um Hin fjögur fræknu þar sem sjá má Rauða draug og prímatana hans.

Persónan Ivan Kragoff er sígilt illmenni í teiknimyndasögunum um hin fjögur fræknu (e. Fantastic Four). Kragoff er sovéskur vísindamaður sem er harðákveðinn í að komast til Tunglsins á undan Ameríkönum og safnar saman hópi þriggja þjálfaðra prímata, górilluna Mikhlo, bavíanann Igor og órangútaninn Peotr.

Í fyrstu kitlunni fyrir myndina sást síðhærður Malkovich í stutta stund en áhorfendur leikarans þurfa sennilega að bíða þar til aukaefni myndarinnar verður gefið út, ef af því verður, til að sjá meira af honum.

Fantastic Four: First Steps verður frumsýnd hér á landi 24. júlí næstkomandi.

Bíó og sjónvarp Hollywood