„Allt upp­selt“ af símum eftir rigninguna

Ýmsir Þjóðhátíðargestir hafa deilt raunum sínum á TikTok síðastliðinn sólarhring þar sem þeir greina frá því að hafa orðið fyrir miska af völdum óveðursins sem reið yfir aðfaranótt laugardags. Fréttastofa heyrði því í Halldóri Inga Guðnasyni, eigandi Heimarafs, einu raftækjaverslunar Vestmannaeyja.

„Það er allt uppselt hjá okkur,“ sagði Halldór Ingi þegar fréttamaður spurði út í símasölu.

Er það ekki óvenjulegt?

„Það er allur gangur á því. Eins og rigningin var á föstudaginn er eðlilegt að fólk sé ekki að pæla mikið í símunum sínum,“ segir Halldór.

„Það er alltaf einhver símasala yfir Þjóðhátíð en þetta var óvenju mikið,“ bætir hann við.

Ekkert nýtt undir sólinni

Þó það sé óvanalegt að allir símar seljist upp segir Halldór það ekki vera í fyrsta skiptið.

„Það er ekkert nýtt undir sólinni í þessu,“ segir Halldór.

Þjóðhátíðargestir skemma vonandi ekki síma sína í kvöld.

„Við skulum vona ekki. Allavega ekki þar til ég fæ nýja sendingu,“ segir Halldór.

Heimaraf lætur sér nægja að selja önnur raftæki í millitíðinni.

„Ég hefði svosem alveg geta græjað nýjan lager í gær, látið senda mér síma en ég var ekkert að stressa mig á því,“ segir Halldór.

En ekki er öll von úti fyrir óheppna símaeigendur.

„Mér skilst að sölubás Nova sé búinn að koma sér upp lager þannig þau geta bjargað fólki,“ segir Halldór.