Hinn óendan­legi leik­manna­hópur Chelsea

Á sínu fyrsta tímabili með Chelsea endaði lið Enzo Maresca í 4. sæti og tryggði sér þar með sæti í Meistaradeild Evrópu. Þá stóð liðið uppi sem Sambandsdeildarmeistari. Það er ljóst að Enzo og forráðamenn félagsins ætla að byggja ofan á þennan árangur. Segja má að félagið sé með skýra sýn en það hefur eingöngu sótt leikmenn sem eru 23 ára eða yngri.

Á vef Transfermarkt má finna lista yfir þá leikmenn sem félagið hefur sótt til þessa. Þeir eru eftirfarandi:

• João Pedro (23 ára) frá Brighton & Hove Albion
• Jamie Gittens (20) frá Borussia Dortmund
• Jorrel Hato (18) frá Ajax
• Liam Delap (22) frá Ipswich Town
• Estêvão (18) frá Palmeiras
• Dário Essugo (20) frá Sporting Lissabon
• Mamadou Sarr (19) frá Strasbourg (Lánaður til baka)
• Kendry Paez (18) frá Independiente (Lánaður til baka)

Þá verður ekki annað sagt en liðið hafi verið duglegt að losa sig við leikmenn og enn er fjöldi orðaður frá félaginu. Það breytir því ekki að leikmannahópur liðsins er gríðarlega fjölmennur og helsta verkefni Enzo gæti verið að halda öllum ánægðum.

Þá hefur félagði verði orðað við Alejandro Garnacho (21), vængmann Manchester United. Það virðist líklegra heldur en ekki að sá endi í Lundúnum á endanum.

Leikmannahópurinn

Sem stendur er Robert Sánchez (27) aðalmarkvörður en hann missti sæti sitt um tíma á síðustu leiktíð. Daninn Filip Jörgensen (23) er varamarkvörður og það virðist sem Gabriel Slonina muni sinna starfi þriðja markvarðar á komandi tímabili.

Það er erfitt að spá fyrir um hvernig varnarlínan muni líta út en reikna má með að Reece James, Marc Cucurella, Levi Colwill verði í stórum hlutverkum. Þar á eftir verður hörð barátta um sæti í liðinu.

Þeir Ben Chilwell og Axel Disasi voru á láni hjá Crystal Palace og Aston Villa á síðustu leiktíð en eru enn í leikmannahópi liðsins. Aðrir varnarmenn sem stendur eru: Jorrel Hato, Alfie Gilchrist, Tosin, Benoît Badiashile, Trevoh Chalobah, Malo Gusto, Wesley Fofana, Aarón Anselmino og Josh Acheampong.

Á miðjunni er svipað vandamál uppi á teningnum. Fyrirliðinn Enzo Fernández verður án efa í aðalhlutverki þrátt fyrir að daðra við Real Madríd í sumar. Hinn stórskemmtilegi Cole Palmer verður einnig á sínum stað og þá má reikna með eða Moisés Caicedo eða Roméo Lavia sjái til þess að léttleikandi miðjumenn njóti sín.

Mykhalo Mudryk er skráður sem leikmaður liðsins en hann hefur verið dæmdur í lyfjabann og verður að teljast ólíklegt að hann komi við sögu.

Þá er Kiernan Dewsbury-Hall er á leið til Everton, Carney Chukwuemeka er orðaður við endurkomu til Borussia Dortmund þar sem hann var á láni á síðustu leiktíð og  Lesley Ugochukwu er svo að ganga í raðir Burnley. Aðrir miðjumenn eru Dário Essugo, Andrey Santos og Omari Kellyman. Segja má að staðan á miðju liðsins sé því nokkuð þunn en fjöldi framherja bætir það upp. Þar er í raun úr of mörgum að velja.

Hinn 23 ára gamli Pedro verður eflaust í stóru hlutverki ásamt nafna sínum Pedro Neto. Þá hefur Delap eflaust verið lofað mínútum sem og Gittens sem kom frá Dortmund.

Framherjinn Armando Broja á leið til Burnley líkt og Ugochukwu. Raheem Sterling er enn leikmaður Chelsea en félagið vill ekkert með hann hafa. Bæði Nicolas Jackson og Christopher Nkunku hafa verið orðaðir við önnur félög. Aðrir framherjar liðsins eru svo sem stendur Estêvão, Tyrique George og Marc Guiu.

Sem stendur telur leikmannahópur liðsins á vefsíðu ensku úrvalsdeildarinnar 39 leikmenn. Reikna má með að hópurinn verði talsvert minni þegar tímabilið hefst en engu að síður þurfa forráðamenn liðsins að hafa hraðar hendur ætli þeir ekki að enda með fjölda óhamingjusamra leikmanna.

Hér má tryggja sér áskrift.