Reikna með að skila hagnaði á næsta ári

Play hafði í júlí varað við líklegu tveggja milljarða króna tapi á ársfjórðungnum í afkomuviðvörun. Vísað var til gengisáhrifa vegna styrkingar íslensku krónunnar, óvænts viðhalds flugvélar auk þess sem Bandaríkjamarkaður skilaði minni árangri en reiknað hafði verið með.

Tap flugfélagsins var um helmingi meira en á sama tíma í fyrra. Í tilkynningu til Kauphallar segir að handbært fé Play sé nú 11,9 milljónir Bandaríkjadala eða tæplega einn og hálfur milljarður króna.

Einar Örn Ólafsson forstjóri Play segir markvisst unnið í að færa leiðarkerfi Play yfir í sólarlandaáætlun og undirstöðu hafi verið lagðar fyrir stöðugri tekjugrunn í formi langtímaleigusamninga á hluta flotans.

„Mikilvægast er að við höfum stigið ákveðin skref til að styðja við breytingar á rekstri félagsins. Í júlí tryggðum við 20 milljónir USD í nýtt fjármagn í gegnum skuldabréfaútboð með breytirétti, með öflugum stuðningi stærstu hluthafa og fagfjárfesta. Þetta styrkir ekki aðeins fjárhagsstöðu okkar heldur sýnir einnig áframhaldandi traust á stefnu og framtíð PLAY.“

Breytingum á viðskiptalíkani Play verði að fullu lokið í lok október, en þá verði fjórar flugvélar í rekstri frá Íslandi. Leigusamningar séu í gildi fyrir fimm af þeim sex flugvélum sem eftir eru, sem styðji við betri nýtingu flotans og tekjumyndun allt árið um kring.

„Með því að vera einungis með flugrekstrarleyfi á Möltu mun rekstrarkostnaðru lækka talsvert. Framvirkar einingartekjur halda áfram að vera sterkar og langtímasamningar um leiguverkefni veita stöðugar tekjur utan háannatíma,“ segir í tilkynningu.

„Gert er ráð fyrir að hagnaður á þriðja ársfjórðungi verði svipaður og í fyrra, þrátt fyrir tímabundna viðgerðarstöðvum á vélum. Búist er við minni taprekstri yfir vetrartímann, sem mun bæta niðurstöðu fjórða ársfjórðungs 2025 og fyrsta ársfjórðungs 2026 um allt að 25 milljónir USD. Play gerir ráð fyrir að skila hagnaði á árinu 2026.“