Lífið

Nígerskt stjörnubrúðkaup í Hall­gríms­kirkju

Agnar Már Másson og Jón Þór Stefánsson skrifa
Skreytingarnar eru ansi veigamiklar.
Skreytingarnar eru ansi veigamiklar. Vísir/Agnar

Nígersk leikkona, dóttir eins ríkasta manns heims mun vera að gifta sig í Hallgrímskirkju í dag. Kirkjan er lokuð milli klukkan þrjú og fimm í dag vegna þess.

Þessa stundina er verið að setja upp skreytingar í kirkjunni vegna brúðkaupsins. Á gólfi Hallgrímskirkju má nú sjá mikið blómahaf.

Samkvæmt heimildum fréttastofu er dóttir eins ríkasta manns heims að gifta sig. Brúðguminn er sagður raftónlistarmaður. Búist er við að tvö hundruð manns muni mæta.

Þá herma heimildir fréttastofu að þrjár hæðir á Edition-hótelinu hafi verið leigðar vegna brúðkaupsveislunnar.

Umrædd leikkona heitir Temi Otedola og er 29 ára gömul. Hún hefur til að mynda leikið í nígerskum kvikmyndum á borð við Citation, sem er dreift af Netflix, og Ms. Kanyin, sem er dreift af Amazon Prime.

Faðir hennar heitir Femi Otedola og er nígerskur athafnamaður sem hefur eignast mestan auð sinn á olíu- og orkuviðskiptum.

Hann er sem stendur í 2566 sæti á lista Forbes yfir ríkustu menn heim og eru eignir hans metnar á 1,3 milljarði Bandaríkjadali, sem jafngildir um 160 milljörðum króna.

Grétar Einarsson, kirkjuhaldari í Hallgrímskirkju, vildi ekki tjá sig um málið við fréttastofu. Verðandi brúðhjónin munu hafa óskað eftir fréttabanni.






Fleiri fréttir

Sjá meira


×


Tarot dagsins

Dragðu spil og sjáðu hvaða spádóm það geymir.