Aldraður boltasækir steig síðasta dansinn

Boltasækirinn sem um ræðir er hinn 27 ára Leifur Þorsteinsson, viðskiptastjóri Creditinfo og stjórnandi hlaðvarpsins Chess After Dark, sem klæddist vestinu sem refsingu.

Leifur hafði tekið þátt í draumaliðsdeild enska boltans (e. Fantasy Premier League) á síðasta tímabili með vinum sínum og var refsingin að vera boltasækir á heimaleik KR á Meistaravöllum. Leifur valdi sér lið í byrjun mótsins en gleymdi að huga að því frekar, svokallað „set and forget“, sem varð til þess að hann endaði langneðstur í deildinni. 

Við tók löng bið.

Beðið eftir boltasæki

Biðin eftir fullorðna boltasækinum lengdist nefnilega fullmikið, aðallega vegna framkvæmda á Meistaravöllum sem hafa staðið yfir í allt sumar vegna lagningar gervigrass. Í lok júlí var völlurinn loks tilbúinn og átti að vígja vestið á fyrsta heimleiknum gegn Breiðablik þann 26. júlí. Leifur forfallaðist hins vegar og varð heimaleikurinn gegn Aftureldingu í gær lendingin.

Leifur mætti rétt fyrir leik í Frostaskjólið en lenti í vandræðum við miðasöluna því sagan þótti of ótrúleg. Hann komst þó á endanum inn og stóð allan leikinn á hliðarlínunni stúkumegin hjá stuðningsmönnum KR. Þar gnæfði Leifur yfir kollega sína enda er verkefnið gjarnan falið börnum undir tólf ára aldri. 

Gjörningurinn vakti mikla lukku meðal stuðningsmanna og söng Miðjan, stuðningsmannasveit KR, meira að segja um kappann. Í þokkabót vann KR langþráðan sigur svo í stúkunni eftir leik var pískrað um það hvort kannski ætti framvegis alltaf að vera einn eldri boltasækir.

Sjá einnig: Mos­fellingar í fallsæti eftir tap í Vestur­bænum

Blaðamaður náði í skottið á Leifi eftir leik og var hann skiljanlega gríðaránægður með sigur sinna manna. Leifur, sem æfði upp yngri flokka KR þar til hann hætti í þriðja flokki, rifjaði upp síðasta skiptið sem hann hafði verið boltasækir en það var á úrslitaleik VISA-bikars karla 2010 þegar FH burstaði KR með fjórum mörkum gegn engu.

Þá sagðist Leifur hafa fengið góð viðbrögð hjá leikmönnum KR við gjörningnum, Aron Sigurðarson hefði haft orð á því að sennilega væri um dýrasta boltasæki landsins að ræða.

Leifur var sömuleiðis ekki viss um að hann færi úr vestinu í bráð og ýjaði að því að hann myndi halda áfram að mæta á hliðarlínuna þar til KR tapaði næst. Spurning hvort af því verður. Þangað til má segja að í gær hafi verið stiginn síðasti dansinn.