Upp­gjörið: Stjarnan - Vestri 2-1 | Andri Rúnar gerði gömlu fé­lögunum grikk

Stjarnan tók á móti Vestra í 19. umferð Bestu deildar karla á Samsungvellinum í Garðabæ í dag. Heimamenn fóru með sigur af hólmi í hörkuleik sem endaði 2-1, og tryggðu sér þar með dýrmæt þrjú stig í efri hluta deildarinnar.

Gestirnir frá Ísafirði byrjuðu af krafti og þurftu áhorfendur ekki að bíða lengi eftir fyrsta marki leiksins, en það kom á 3. mínútu þegar Anton Kralj skoraði laglegt mark eftir frábæra fyrirgjöf frá Ágústi Eðvald Hlynssyni.

Stjarnan jafnaði metinn eftir klaufaleg mistök í vörn Vestra. Sergine Fall reyndi sendingu til baka á Guy Smit í markinu. Andri Rúnar Bjarnason komst fyrir sendinguna, klobbaði Guy Smit og lagði boltann í netið.

Andri Rúnar var aftur á ferðinni skömmu síðar og kom boltanum í netið á móti uppeldis félaginu eftir góða fyrirgjöf frá Jóhanni Árna Gunnarssyni. Stjarnan leiddi, 2-1, í hálfleik.

Bæði lið voru ógnandi í síðari hálfleik en Vestri töluvert líklegri til þess að skora. Þeir náðu að koma boltanum einu sinni í netið en markið fékk ekki að standa og var dæmt af vegna rangstöðu.

Stjarnan heldur áfram að sækja stig og sitja í 4. sæti með 31 stig, aðeins einu stigi á eftir Blikum og Víkingi R, sem eiga þó leik til góða.

Atvik leiksins

Markið sem var tekið af Vestra, Guðmundur Ingi, aðstoðardómari metur sem svo að Vladimir Tufegdzic hafi verið fyrir innan og haft áhrif á Árna Snæ, markvörð Stjörnunar.

Stjörnur og skúrkar

Andri Rúnar Bjarnason maður leiksins með tvö mörk, alvöru framherji sem er góður í að slútta.

Ágúst Eðvald Hlynsson var öflugur í liði Vestra og með eina stoðsendingu. Hefðu verið tvær ef jöfnunarmarkið hefði fengið að standa.

Stemning og umgjörð

Það er alltaf góð stemning hérna í Garðabænum, góð mæting hjá stuðningsmönnum beggja liða en gestirnir virðast hafa gleymt trommunum heima.

Dómarar

Dómari leiksins í dag var Ívar Orri Kjartansson. Aðstoðardómarar hans voru Eysteinn Hrafnkelsson (AD1) og Guðmundur Ingi Bjarnason (AD2).

Í fyrri hálfleik notaði Ívar Orri, dómari leiksins flautuna takmarkað og voru menn misánægðir með það.

Viðtöl

Andri Rúnar: Ég fagna ekki á móti uppeldisfélaginu

„Orkan var mjög góð, við vorum orðnir þreyttir í lokinn og þeir náðu að þrýsta okkur vel niður. Það var kannski öðruvísi endir á leiknum en oft áður hjá okkur, við vorum að gera ljótu hlutina og henda okkur fyrir skot og loka þessum leik. Þetta var ekki fallegt en ógeðslega gott að sýna að við getum gert þetta líka.“ sagði Andri Rúnar Bjarnason, leikmaður Stjörnunnar, sáttur eftir sigur liðsins gegn Vestra í dag.

„Það voru svæði til þess að búa til meira, við fengum stangarskot og annað. Við hefðum geta drepið leikinn aðeins fyrr, en þeir ná að þrýsta okkur niður og þá er maður sáttur með þrjú stig upp úr þessu.“

Andri Rúnar Bjarnason, leikmaður Stjörnunnar, kom til félagsins frá uppeldisfélagi sínu Vestra á þessu ári. Hann ber mikla virðingu fyrir mótherjanum, klúbbur sem hann er alinn upp hjá og kaus hann að fagna ekki mörkunum sínum.

Var það almenn kurteisi að setja ekki þriðja markið í dag?

„Manni langar alltaf að skora þrennuna. Ég var aldrei að fara að fagna á móti uppeldisfélaginu. Það er oft sagt að maður eigi að fagna öllum mörkum en þetta er heimaklúbburinn minn sem ég spilaði fyrir í 20 ár og ég var aldrei að fara fagna mörkunum mínum. Ég nennti svo ekki að Sammi(Samúel Samúelsson, formaður meistaraflokks karla hjá Vestra) myndi hringja í mig og öskra á mig þannig ég lét þriðja markið eiga sig.“