Hátt í þrjú hundruð mót­mæla útlendingastefnu stjórn­valda

Á Facebook-viðburði mótmælafundarins er fundinum ekki lýst frekar en að „stefnu ríkisstjórnarinnar í málefnum hælisleitenda á Íslandi“ sé mótmælt en fjöldahreyfingin hefur vakið nokkra athygli síðustu mánuði.

Við grófa talningu úr vefmyndavél af Ausrturvelli má sjá um hátt í þrjú hundruð manns við mótmæli á Austurvelli.

Meðal viðstaddra eru liðsmenn Skjaldar Íslands en menn úr þeirra röðum hafa á síðustu mánuðum sinnt „öryggisgæslu“ á fundum Íslands, þvert á flokka, eins og skipuleggjendur hafa kallað það. Þeir hafa verið sakaðir um að bera tákn nasista en hafa ítrekað neitað því, en hafa þó nú skipt um merki.

Að venju halda viðstaddir mótmælendurnir íslenska þjóðfánann á lofti og flytur fjöldi fólks ræðu.

Forsprakki hreyfingarinnar Íslands, þvert á flokka er Sigfús Aðalsteinsson en hann og Baldur Borgþórsson, fyrrverandi varaborgarfulltrúi Miðflokksins, hafa verið í broddi fylkingar þjóðernissinnanna sem hafa fengið sig fullsadda af streymi hælisleitenda til landsins.