Viðskipti innlent

Ólafur Ragnar með rúma milljón meira en næsti maður

Kjartan Kjartansson skrifar
Ólafur Ragnar í ræðupúlti á Hringborði norðurslóða, árlegri ráðstefnu sem hann átti frumkvæði að. Hann hefur ekki lapið dauðann úr skel eftir að hann lét af embætti forseta á sínum tíma.
Ólafur Ragnar í ræðupúlti á Hringborði norðurslóða, árlegri ráðstefnu sem hann átti frumkvæði að. Hann hefur ekki lapið dauðann úr skel eftir að hann lét af embætti forseta á sínum tíma. Vísir/Vilhelm

Rúmri milljón króna munar á tekjum Ólafs Ragnars Grímssonar, fyrrverandi forseta, og næsta manns á tekjulista forseta, þingmanna og ráðherra í Tekjublaði Frjálsrar verslunar sem kom út í dag. Varaformaður Sjálfstæðisflokksins er tekjuhæstur þingmanna.

Ólafur Ragnar var með rúmar 4,7 milljónir króna í mánaðartekjur í fyrra samkvæmt Tekjublaðinu. Á eftir honum kemur Guðni Th. Jóhannesson, eftirmaður hans í embætti, með tæpar 3,7 milljónir króna. Vigdís Finnbogadóttir, forveri Ólafs Ragnars, var með tæpar 3,2 milljónir króna í fyrra samkvæmt listanum.

Tekjublað Frjálsrar verslunar kom út í dag en rétt er að árétta að um er að ræða útsvarsskyldar tekjur á árinu 2024 og þurfa þær ekki að endurspegla föst laun viðkomandi. Munurinn getur falist í launum fyrir setu í nefndum og önnur aukastörf og hlunnindi vegna kaupréttarsamninga. Í launum sumra kann að vera falinn bónus vegna ársins 2023 sem var greiddur árið 2024.

Miðað er við útsvarsstofn samkvæmt álagningarskrá en í tölunum eru ekki fjármagnstekjur, til dæmis af vöxtum, arði eða sölu hlutabréfa. Sleppt er skattfrjálsum dagpeningum, bílastyrkjum og greiðslum í lífeyrissjóði. Þá ber að hafa í huga að inn í tekjunum geta líka verið einskiptisgreiðslur vegna úttektar á séreignasparnaði hjá lífeyrissjóði.

Verktakagreiðslur flokkast ekki sem útsvarsskyldar tekjur og eru því ekki teknar fyrir í álagningaskrá Ríkisskattstjóra sem Tekjublaðið styðst við.

Í fjórða sæti á listanum er Jens Garðar Helgason, þingmaður og varaformaður Sjálfstæðisflokksins og fyrrverandi aðstoðarforstjóri laxeldisfyrirtækisins Kaldvíkur, með rúmar 2,8 milljónir króna í mánaðartekjur. Hanna Katrín Friðriksson, atvinnuvegaráðherra, er tekjuhæsti ráðherrann með tæpar 2,8 milljónir króna.

https://www.visir.is/g/20242610178d/olafur-ragnar-skakar-vigdisi-og-gudna

Fjórir ráðherrar í ríkisstjórn eru ekki á tekjulistanum. Núverandi ríkisstjórn tók ekki við fyrr en í desember í fyrra en listinn byggir á tekjum síðasta árs.

Laun núverandi ráðherra:

  • Þorgerður Katrín Gunnarsdóttir, utanríkisráðherra. 2,1 milljón króna.
  • Kristrún Frostadóttir, forsætisráðherra. 2,1 milljón króna.
  • Inga Sæland, félagsmálaráðherra. 2,1 milljón króna.
  • Logi Már Einarsson, menntamálaráðherra. 1,9 milljónir króna.
  • Eyjólfur Ármannsson, innviðaráðherra. 1,6 milljónir króna.
  • Jóhann Páll Jóhannsson, umhverfis-, orku- og loftslagsráðherra. 1,6 milljónir króna.

Fyrrverandi ráðherrar eru ofar á listanum. Hæstur þeirra er Guðmundur Ingi Guðbrandsson, fyrrverandi félagsmálaráðherra, í sjöunda sæti með rúmar 2,6 milljónir króna. Rétt á eftir honum er Bjarni Benediktsson, fyrrverandi forsætisráðherra, með 2,6 milljónir.

Á eftir Jens Garðari er Dagur B. Eggertsson, þingmaður Samfylkingarinnar, tekjuhæsti þingmaðurinn með 2,7 milljónir króna og í sjötta sæti listans. Hann var formaður borgarráðs þar til hann var kjörinn á þing.

Bjarni Benediktsson var tekjuhæstur formanna stjórnmálaflokkanna í fyrra. Sigurður Ingi Jóhannsson, formaður Framsóknarflokksins, kom á eftir honum með 2,4 milljónir króna rúmar. Guðrún Hafsteinsdóttir, sem tók við af Bjarna sem formaður Sjálfstæðisflokksins í ár, var með tæpar 2,3 milljónir króna. Sigmundur Davíð Gunnlaugsson, formaður Miðflokksins var með rúmar 2,1 milljónir króna. Lestina reka svo formenn núverandi ríkisstjórnarflokka.

Tekjur Ólafur Ragnar Grímsson Forseti Íslands Kjaramál


Mest lesið


Fleiri fréttir

Sjá meira


×

Mest lesið