Lýst eftir Ólafi í Búlgaríu

Lögreglunni á Suðurlandi barst tilkynning 21. ágúst um Íslending sem var talinn týndur í Búlgaríu, að sögn Garðars Más Garðarssonar varðstjóra, sem staðfestir að Ólafur sé eftirlýstur í alþjóðakerfi lögreglu sem týndur einstaklingur.

Ingibjörg Austmann, systir Ólafs, vakti athygli á málinu á Facebook í dag, inni á hópnum Íslendingar í útlöndum, og óskaði eftir hjálp frá fólki sem þekkti til í höfuðborginni Sófíu í Búlgaríu. 

Þar kemur fram að hvorki hafi sést né heyrst frá honum síðan seinnipart mánudagsins 18. ágúst. Síðast hafi hann sést á bensínstöð í Sófíu.

„Hann hefur verið veikur og verið að fá krampaköst,“ skrifar Ingibjörg.

Ólafur er 184 sentímetrar á hæð, með dökkt hár og grannvaxinn. Hann var að sögn Ingibjargar í gallabuxum og svartri skyrtu þegar hann hvarf. Systir hans bendir á að hann sé líklega skólaus, símalaus og án skilríkja. 

Hún bendir fólki á að hringja í síma 112 ef það hefur frekari upplýsingar um ferðir Ólafs.