Leikari, óperu­söngvarar og sjó­maður vilja stýra óperunni

Í júlí samþykkti Alþingi frumvarp um breytingu á sviðslistalögum þar sem fjallað var um stofnun Þjóðaróperu, sem mun starfa undir Þjóðleikhúsinu. Með samþykkt laganna var hægt að hefjast handa við að koma Þjóðaróperu á koppinn. Fyrsta verk var eins og gefur að skilja að auglýsa eftir óperustjóra.

Ellefu sóttu um stöðuna og þar kennir ýmissa grasa, þó að flestir hafi tengsl við sviðslistirnar. Á meðal umsækjenda eru Níels Thibaud Girerd leikari, Þorleifur Örn Arnarsson leikstjóri, Alexandra Chernyshova óperusöngkona og einn sjómaður.

Umsækjendur um stöðu óperustjóra:

• Alexandra Chernyshova, óperusöngkona, tónskáld og tónlistarstjóri
• Atli Ingólfsson, tónskáld, prófessor við Listahaskóla Íslands
• Bjarni Thor Kristinsson, óperusöngvari og leikstjóri
• Finnur Bjarnason, óperusöngvari og sérfræðingur
• Gunnar Karel Másson, tónskáld
• Halldór Einarsson Laxness, leikstjóri
• Jóhann Smári Sævarsson, óperusöngvari og listrænn stjórnandi/óperustjóri Norðuróps
• Níels Thibaud Girerd, leikari
• Richard Schwennicke, stjórnandi og répétiteur hjá Þjóðaróperunni í Vín
• Þorleifur Örn Arnarsson, leikstjóri
• Þórður Emil Sigurvinsson, sjómaður

Í svari menningar-, nýsköpunar- og háskólaráðuneytisins við fyrirspurn Vísis segir að gert sé ráð fyrir að skipað verði í embættið eigi síðar en 15. nóvember 2025 en hæfnisnefnd leggi mat á umsóknirnar og veiti í kjölfarið ráðherra umsögn.