Verkalýðs­leið­togar segja ríkis­stjórnina þver­brjóta leik­reglur vinnu­markaðarins

„Með þessum áformum afhjúpar ríkisstjórnin þekkingar- og skeytingarleysi sitt á mikilvægi samstarfs við aðila vinnumarkaðarins,“ segir í yfirlýsingu frá forseta ASÍ og formönnum Fíh, KÍ, BHM og BSRB.

Fordæmalaust sé að stjórnvöld taki einhliða ákvörðun um breytingar á grundvallarréttindum vinnandi fólks án samráðs við verkalýðshreyfinguna. Verkalýðsforkólfarnir segja þetta bætast við fyrirætlanir ríkisstjórnarinnar af sama toga um skerðingu atvinnuleysistrygginga sem og skerðingu réttinda örorku- og ellilífeyrisþega í lífeyrissjóðum.

Undir yfirlýsinguna skrifa Finnbjörn A Hermannsson, forseti Alþýðusambands Íslands (ASÍ), Helga Rósa Másdóttir, formaður Félags íslenskra hjúkrunarfræðinga (Fíh), Magnús Þór Jónsson, formaður Kennarasambands Íslands (KÍ), Kolbrún Halldórsdóttir, formaður Bandalags háskólamanna (BHM), og Sonja Ýr Þorbergsdóttir, formaður BSRB, stærstu samtaka opinberra starfsmanna á Íslandi.

„Grunnstoð íslenska vinnumarkaðsmódelsins er náið samráð og samskipti aðila vinnumarkaðarins og stjórnvalda um öll þau mál er snúa að kjörum launafólks. Þetta módel er undirstaða sterks vinnumarkaðar á Íslandi og velferðarsamfélagsins og er lykilatriði að farsæld þeirra verkefna sem unnin eru á vettvangi ríkisins.“

Fréttin er í vinnslu.