Fannst Þórsarar og Lárus þurfa frí frá hvor öðrum

Lárus hefur þjálfað Þór frá 2020 og gerði liðið að Íslandsmeisturum á fyrsta tímabili. Á síðasta tímabili lentu Þórsarar í 10. sæti Bónus deildarinnar og komust ekki í úrslitakeppnina í fyrsta sinn í átta ár. Lárus var orðaður við önnur félög í sumar, meðal annars Keflavík, en verður áfram við stjórnvölinn hjá Þór.

Benedikt segir að Þórsarar geti ekkert slakað á í vetur, annars gæti farið illa og liðið hreinlega fallið.

„Þórsararnir mæta ekkert í þetta mót og þurfa ekkert að pæla í að þeir séu ekki að fara að falla. Fyrsta markmið hjá þeim er bara að halda sér uppi. Þetta eru rosalegar margar breytingar á liðinu,“ sagði Benedikt í upphitunarþætti Bónus Körfuboltakvölds.

Að mati Benedikts hefðu Lárus og Þórsarar sennilega átt að slíta samstarfi sínu í sumar.

„Mér fannst vera komin einhver þreyta í þetta Þórslið. Maður sá ekki alveg neistann sem hefur verið í þessu liði undanfarin ár. Þannig að mér, þar sem ég fæ nú greitt fyrir að segja mínar skoðanir, fannst Þórsararnir þurfa breytingu á þjálfara og fannst Lalli, þessi frábæri þjálfari, þurfa annað krefjandi verkefni,“ sagði Benedikt.

„Ég held að það hafi verið „win-win“ fyrir báða aðila en það getur verið að ég hafi kolrangt fyrir mér. En mér sýndist það á öllu en svo er kannski endurnýjun á liðinu og þessi neisti kemur aftur.“

Umræðuna úr Bónus Körfuboltakvöldi má sjá í spilaranum hér fyrir ofan.

Þór sækir nýliða ÍA heim í kvöld. Leikurinn hefst klukkan 19:15 og verður sýndur beint á Sýn Sport Ísland.