Haaland lyfti Man City upp í sjötta sætið

Erling Haaland skoraði eina mark sinna manna í Manchester City þegar lærisveinar Pep Guardiola unnu mikilvægan 1-0 útisigur á Brentford í ensku úrvalsdeildinni.

Leikurinn var heldur lokaður þó gestirnir frá Manchester hafi verið með boltann nær allan leikinn. Á endanum var það mark Norðmannsins á 9. mínútu sem skildi liðin að.

Joško Gvardiol átti þá sendingu á framherjann sem sýndi þann mikla styrk sem hann býr yfir með því að halda varnarmönnum Brentford frá sér áður en fast skot hans í skrefinu söng í netinu.

Ef til vill má setja spurningamerki við Caoimhín Kelleher í marki Brentford en það verður ekki gert hér. Hann átti fína vörslu síðar í leiknum og hélt sínum mönnum í leiknum.

Lokatölur 0-1 sem þýðir að Man City er nú með 13 stig í 6. sæti, aðeins þremur stigum á eftir toppliði Arsenal. Á sama tíma er Brentford með sjö stig í 16. sæti.