Alsír tuttugasta þjóðin inn á HM

Alsír varð í dag tuttugasta þjóðin til að ná HM-sæti og verður því með á HM í fyrsta sinn frá því árið 2014. Enn eru 28 sæti laus á mótinu því það hefur verið stækkað og taka nú 48 þjóðir þátt í stað 32 áður.

Alsír vann Sómalíu á útivelli í dag, 3-0, og er því með fjögurra stiga forskot á Úganda á toppi G-riðils í undankeppninni í Afríku, þegar aðeins ein umferð er eftir.

Mohamed Amoura, framherji Wolfsburg, skoraði tvö marka Alsír í dag og hinn 34 ára gamli Riyad Mahrez, leikmaður Al Ahli en áður Manchester City og Leicester, skoraði eitt mark.

Í gær tryggði Egyptaland sig inn á HM og eru fjórar Afríkuþjóðir nú komnar inn á mótið því áður höfðu Túnis og Marokkó tryggt sér farseðil.