Þurftu að af­lýsa 24 þúsund manna maraþon­hlaupi

Uppselt var á viðburðinn og búist var við metfjölda, eða 24 þúsund hlaupurum, á sunnudag. Í fyrra tóku 21 þúsund manns þátt í maraþoninu.

„Vinsamlegast komið ekki að rásmarki. Viðburðurinn fer ekki fram. Frekari upplýsingar verða sendar út,“ sagði í Facebook-færslu frá Höfðaborgarmaraþoninu, sem Sanlam styrkir, snemma á sunnudagsmorgun.

Í kjölfar þess að 32. Sanlam Cape Town-maraþoninu var aflýst tilkynnti aðalstyrktaraðilinn Sanlam um velvildarvott til að styðja við vonsvikna hlaupara.

Allir skráðir þátttakendur fá styrkta skráningu í annaðhvort maraþonið í maí 2026 eða 2027. Þetta tilboð gildir óháð því hvort maraþonið fær stöðu sem fyrsta Abbott World Marathon Majors-hlaupið í Afríku.

Skipuleggjendur aflýstu hlaupinu snemma sunnudaginn 19. október vegna mikils vinds. Sterkar vindhviður á Woodstock-svæðinu gerðu hlaupaleiðina óörugga og mannvirki á bæði rás- og endamarkssvæðum urðu fyrir skemmdum.

Höfðaborgarmaraþoninu var því aflýst vegna aðstæðna sem sköpuðu öryggisáhættu fyrir hlaupara, starfsfólk og áhorfendur og var ákvörðunin tekin rétt áður en hlaupið átti að hefjast.

Clark Gardner, framkvæmdastjóri Sanlam Cape Town-maraþonsins, lýsti yfir vonbrigðum sínum með að aflýsa þurfti maraþoninu.

„Við erum niðurbrotin,“ sagði Gardner. „Við höfum unnið í marga mánuði við að skipuleggja fyrir allar mögulegar aðstæður og skilyrði, en að lokum hafði æðra vald lokaorðið og við erum miður okkar yfir því að aflýsa þurfti Cape Town-maraþoninu.“

Ashwin Maggot er einn þeirra sem ætlaði að keppa á mótinu og var búinn að leggja mikið á sig við undirbúninginn.

„Sextán vikur af snemmbúnum morgnum, síðkvöldum og fórnum á tíma með konunni minni og börnunum, allt fyrir þetta eina augnablik. Þetta átti að vera fyrsta maraþonið mitt, eitthvað sem mig hefur dreymt um í mörg ár. Ég þraukaði í gegnum meiðsli, eyddi klukkustundum hjá hreyfifræðingnum og sjúkraþjálfaranum og gaf allt til að vera tilbúinn. Að heyra að því hafi verið aflýst á elleftu stundu. það er niðurdrepandi,“ sagði Ashwin Maggot.