„Einn af bestu leik­mönnunum í sögu ís­lensks körfu­bolta“

Haukur meiddist í sumar og missti á grálegan hátt af Evrópumótinu með íslenska landsliðinu en hann er kominn aftur af stað og sýndi styrk sinn í síðustu umferð. Það fór heldur ekki fram hjá strákunum í Bónus Körfuboltakvöldi sem lofuðu hans leik.

„Haukur Helgi Pálsson, velkominn til baka eftir þessi einkennilegu meiðsl þín. Þó að hann sé nú kannski kominn til baka fyrir nokkrum umferðum þá var hann algjörlega geðveikur í þessum leik,“ sagði Stefán Árni Pálsson. Haukur var með 23 stig og 8 stoðsendingar og framlag upp á 34.

Áttatíu prósent nóg 

„Þegar hann er áttatíu prósent þá er hann bara með bestu leikmönnum á landinu. Það er alveg unun að horfa á hann spila því hann er svo góður,“ sagði Magnús Þór Gunnarsson, sérfræðingur Körfuboltakvölds.

Haukur Helgi er kannski að eldast en hann er enn í hópi bestu leikmanna deildarinnar.

„Hann kann leikinn best. Þú veist, sendingarnar og allt bara hjá honum. Eins og svona, ef einhverjir minni strákar ætla að dekka hann og hann bara fer með þá upp að körfunni,“ sagði Magnús.

„Sævar, hversu mikilvægt verður það fyrir Álftnesinga ef þeir ætla sér alla leið, að hafa reynslubolta, mann sem þekkir deildina inn og út? Að hafa leiðtogann Hauk Helga Pálsson,“ spurði Stefán Árni

Fær í öllum þáttum leiksins

„Eins og Maggi kemur inn á, þá er Haukur Helgi sennilega, þegar hann er áttatíu prósent, einn af betri leikmönnum deildarinnar. Maðurinn er fær í öllum þáttum leiksins. Þrátt fyrir að vera búinn að missa hraða og kannski sprengikraft og svona stökkkraft, þá er hann enn þá nautsterkur. Hann les leikinn vel,“ sagði Sævar Sævarsson, sérfræðingur Körfuboltakvölds.

„Hann er frábær varnarmaður, getur dekkað þrist, fjarka og fimmu. Og svo er það með sendingargetuna sem við sáum náttúrulega rosalega vel í þessum klippum. Það er eiginlega ekkert hægt að hrósa Hauki Helga eitthvað meira en við höfum gert síðastliðin ár,“ sagði Sævar.

Gerir alla í kringum sig betri

„Þetta er einn af bestu leikmönnunum í sögu íslensks körfubolta,“ sagði Sævar og Magnús tók undir það.

„Hann gerir alla í kringum sig betri. Alveg sama hver er inni á vellinum, sá leikmaður verður bara miklu betri með Hauk innanborðs,“ sagði Magnús.

Það má horfa á alla umræðuna um Hauk Helga hér fyrir ofan.