„Eitt­hvað sem þarf að endur­vekja líka“

Brynjar tekur við starfinu af Ágústi Gylfasyni sem hætti að loknu síðasta tímabili. Undir stjórn Ágústs tókst Leikni að forða sér frá falli niður í 2. deild með því að vinna tvo síðustu leiki sína og enda í 9. sæti, fjórum stigum frá fallsæti. Brynjar býr yfir mikilli reynslu og var til að mynda sérstakur meðþjálfari Íslandsmeistara Víkings í sumar vegna kröfu UEFA um réttindi þjálfara í Evrópukeppnum. Hann hefur einnig þjálfað HK, Örgryte og Grindavík auk þess sem hann var aðstoðarþjálfari hjá Stjörnunni og Fylki.

„Þetta leggst bara vel í mig. Það er góður efniviður þarna, í bland yngri og eldri strákar og aðstaðan er góð. Þetta verður spennandi verkefni að takast á við,“ segir Brynjar í Sportpakkanum á Sýn í gærkvöldi.

„Núna er bara að byrja á því að kynnast strákunum og meta hópinn fyrir áramót. Síðan er þetta bara klassískt. Reyna æfa vel, vera skipulagðir og agaðir. Svo þarf að skapa liðsheild með öllu því sem fylgir. Ef þetta gengur þá er hægt að gera helling í fyrstu deildinni. En deildin er sterk og það eru mörg lið að berjast um þessi sæti í efri hlutanum.“

Hann segir að lokum að það sé allt til alls í Breiðholtinu til að gera góða stemningu í kringum liðið.

„Við höfum alveg séð það í gegnum árin að þegar það hefur gengið vel þá hefur fólk mætt á völlinn og stutt vel við liðið og það er eitthvað sem þarf að endurvekja líka.“