Mun fljúga milli Kefla­víkur og Mont­real næsta sumar

Þetta kemur fram í tilkynningu frá Isavia. Þar segir að flogið verði á milli Montreal í Kanada og Keflavíkurflugvallar tvisvar í viku, mánudaga og miðvikudaga, frá 17. júní á næsta ári til 28. september. Þetta sé í fyrsta sinn sem Air Transat flýgur til Íslands.

Air Transat var stofnað árið 1986 og verður því fjörutíu ára á næsta ári. Það flýgur til um sextíu áfangastaða í tuttugu og fimm löndum. Höfuðstöðvar félagsins eru í Montreal í Québec-fylki í Kanada.

Haft er eftir Grétari Má Garðarssyni, forstöðumanni flugfélaga og markaðsmála á Keflavíkurflugvelli, að það sé mikið gleðiefni að bjóða Air Transat velkomið í hóp flugfélaga á Keflavíkurflugvelli. „Með þessari nýju viðbót aukum við enn við framboð af flugrekendum hér á landi. Flugleið þeirra til Montreal styrkir tengsl Íslands og Kanada og endurspeglar bæði vaxandi aðdráttarafl Íslands sem áfangastaðar og styrk Keflavíkurflugvallar,“ segir Grétar Már.