Arf­taki Sig­ríðar Bjarkar þarf að upp­fylla þessi skil­yrði

Sigríður Björk Guðjónsdóttir lét nýlega af störfum sem ríkislögreglustjóri eftir gagnrýni um greiðslur til ráðgjafarfyrirtækis. Hún tekur við stöðu sérfræðings í aðgerðum gegn kynbundnu ofbeldi í dómsmálaráðuneytinu en málaflokkurinn hefur verið henni hugleikinn alla tíð.

Grímur Hergeirsson, lögreglustjóri á Suðurlandi, er settur ríkislögreglustjóri á meðan arftakans er leitað. Þá hefur skipan lögreglustjóra á Suðurnesjum verið sett á frest á meðan skipað er í embætti ríkislögreglustjóra.

Í auglýsingunni segir að leitað sé að öflugum leiðtoga með skýra sýn og getu til þess að leiða fólk til árangurs, í þeim tilgangi að móta og efla starfsemi embættisins.

Helstu hæfniskröfur eru eftirfarandi:

• Öflug leiðtogahæfni og farsæl reynsla af stjórnun og stefnumótun er skilyrði.
• Rík samskipta- og samstarfshæfni er skilyrði.
• Þekking og yfirsýn yfir verkefni lögreglunnar og skýr framtíðarsýn varðandi embætti ríkislögreglustjóra og þróun löggæslu er skilyrði.
• Þekking og reynsla á sviði reksturs og áætlanagerðar er skilyrði.
• Þekking og reynsla af umbótastarfi er kostur.
• Reynsla af alþjóðasamstarfi er kostur.
• Fagmennska, frumkvæði, drifkraftur og lausnamiðuð hugsun.
• Mjög gott vald á íslensku og ensku og færni til að tjá sig í ræðu og riti.

Dómsmálaráðherra skipar í embætti ríkislögreglustjóra til fimm ára í senn og skipað verður í embættið þegar nefnd sem metur hæfni umsækjenda hefur lokið störfum. Öllum umsóknum verður svarað þegar ákvörðun um skipun liggur fyrir. Nöfn allra umsækjenda verða birt á vef ráðuneytisins að liðnum umsóknarfresti.

Fram kemur að ríkislögreglustjóri fari með málefni lögreglu í umboði dómsmálaráðherra, sé forstöðumaður embættisins og beri faglega og fjárhagslega ábyrgð á starfi þess.

„Hlutverki ríkislögreglustjóra er nánar lýst í 5. gr. lögreglulaga nr. 90/1996 og reglugerð um starfsemi, hlutverk og ábyrgð embættis ríkislögreglustjóra nr. 325/2021. Eitt af hlutverkum ríkislögreglustjóra er að starfrækja lögregluráð sem er formlegur samráðsvettvangur lögreglustjóra og er ríkislögreglustjóri formaður ráðsins.“