Flautumark hjá FH og ÍR með þeim í Höllina

FH sótti Aftureldingu heim í Mosfellsbæ í kvöld og úr varð sérlega spennandi leikur. Liðin skiptust á forystunni í fyrri hálfleik þar sem munurinn varð aldrei meiri en eitt mark fyrsta hálftímann. FH var ofan á þegar hálfleiksflautið gall, staðan 16-15 í hléi.

FH byrjaði síðari hálfleikinn betur og í fyrsta sinn jókst munurinn um meira en eitt mark og var orðin heil sex mörk, 21-15, eftir að FH-ingar höfðu skorað fyrstu fimm mörk hálfleiksins.

Við tók áhlaup frá Mosfellingum sem jöfnuðu, 23-23, um hálfleikinn miðjan og við tók þá loka korter sem var keimlíkt fyrri hálfleiknum. FH var ávallt skrefi á undan en Mosfellingum tókst að jafna með marki Þorvaldar Tryggvasonar þegar tíu sekúndur voru eftir.

Allt stefndi í framlengingu en FH-ingar tóku leikhlé til að stilla upp í síðustu sókn sína sem skotgekk. Garðar Ingi Sindrason skoraði flautumark á lokasekúndunni af miðjum teignum til að skjóta FH-inga áfram í undanúrslit bikarsins.

Garðar var markahæstur FH-inga í kvöld með átta mörk en Símon Michael Guðjónsson skoraði sjö. Ihor Kopyshynskyi skoraði átta fyrir Mosfellinga sem fara súrir á koddann í nótt.

Breiðhyltingar örugglega áfram

ÍR úr Breiðholti fór einnig áfram í undanúrslit í kvöld eftir sigur á Fjölni í Grafarvogi.

ÍR-ingar náðu 5-1 forystu snemma leiks gegn B-deildarliði og litu aldrei um öxl. Þeir leiddu með fimm mörkum í hálfleik 21-16 og héldu forystunni allt til loka.

Þeir juku forystuna raunar og unnu með átta marka mun í miklum markaleik, 42-34.

Baldur Fritz Bjarnason var markahæstur ÍR-inga með 13 mörk en Bernard Kristján Owusu Darkoh skoraði átta líkt og Sveinn Brynjar Agnarsson. Í liði Fjölnis var Aðalsteinn Örn Aðalsteinsson markahæstur með tíu mörk.

ÍR og FH fylgja því Haukum og KA áfram í úrslitahelgina í Laugardalshöllinni í mars næstkomandi.