Mest lesið í er­lenda sportinu: Króatarnir hans Dags, huggandi Zlatan og svip­leg fráföll

Í janúar á ári hverju eru jafnan öll augu á íslenska karlalandsliðinu í handbolta og það var engin undantekning á því í ár.

Íslenska liðið tapaði aðeins einum leik á HM 2025, fyrir Króatíu sem Dagur Sigurðsson stýrir. Eftir tapið fyrir Króötum var ljóst að Íslendingar þyrftu að treysta á að Slóvenar réttu þeim hjálparhönd til að eiga möguleika á að komast upp úr milliriðli.

Íslendingar fylgdust því spenntir með beinni textalýsingu frá leik Króatíu og Slóveníu. Vonin var lengi vel til staðar en Króatar höfðu á endanum betur, 29-26, og því var ljóst að Íslendingar væru úr leik. 

Vítaspyrnukeppnin í leik Englands og Svíþjóðar í átta liða úrslitum á EM kvenna í fótbolta var eftirminnileg í meira lagi. Meðal þeirra sem brást bogalistin í vítakeppninni var hin unga Smilla Holmberg. Englendingar unnu vítakeppnina, 2-3, og fóru alla leið og urðu Evrópumeistarar annað sinn í röð.

Holmberg var óhuggandi eftir leikinn en fékk hughreystandi skilaboð frá skærustu fótboltastjörnu Svía fyrr og síðar, sjálfum Zlatan Ibrahimovic sem er átrúnargoð þessarar efnilegu fótboltakonu.

Stórt áfall reið yfir CrossFit-heiminn á árinu sem nú er að líða. Á Cholula-leikunum í Mexíkó í maí lést hin 24 ára Nayeli Clemente eftir að hafa farið í hjartastopp. 

Leikmaður Englandsmeistara Liverpool og portúgalska landsliðsins, Diogo Jota, lést einnig í blóma lífsins, í bílslysi á Spáni ásamt bróður sínum, Andre Silva, 3. júlí. Jota var 29 ára, nýgiftur og lét eftir sig þrjú ung börn.

Fréttir af Michael Schumacher vekja jafnan mikla athygli. Dómur féll í fjárkúgunarmáli gegn öryggisverði sem reyndi svíkja fé út úr fjölskyldu heimsmeistarans sjöfalda. Corrinu, eiginkonu Schumachers, fannst öryggisvörðurinn sleppa full billega en hann fékk tveggja ára skilorðsbundinn dóm.

Leikhlé Dags í úrslitaleik heimsmeistaramótsins í handbolta, þar sem Danmörk vann öruggan sigur á Króatíu, 26-32, vakti sömuleiðis mikla athygli. Dagur talaði þar tæpitungulaust og hlaut hrós fyrir frá Króötum.

Björn Borg, sem var einn fremsti tenniskappi heims á sínum tíma, gaf út ævisögu sína í ár. Þar greindi hann meðal annars frá kókaínfíkn sinni og því þegar hann var lífgaður við eftir að hafa tekið of stóran skammt.

Þrautaganga Alexanders Blonz var valinn aftur í norska landsliðið í vetur eftir að hafa glímt við erfið veikindi. Hann fékk blóðtappa í heila en athugul kærasta hans, Elina Österli, tók eftir því að eitthvað var að.