Ein­kunnir Strákanna okkar á móti Pól­landi: Vel­kominn Haukur og Ýmir í víga­hug

Pólverjar gerðu Íslendingum erfitt fyrir framan af leik. Of margar sóknir íslenska liðsins fóru í súginn og færanýtingin var undir pari. Vörnin var hins vegar sterk og smám saman tók Ísland fram úr. Staðan í hálfleik var 10-13, Íslendingum í vil.

Íslenska liðið byrjaði seinni hálfleikinn af gríðarlegum krafti og eftir sex mínútur var munurinn orðinn sex mörk, 12-18.

Íslendingar héldu áfram að hamra járnið meðan það var heitt, skoruðu sex mörk gegn tveimur og náðu tíu marka forskoti, 14-24, um miðjan seinni hálfleik. Þá var björninn unninn og á endanum munaði átta mörkum á liðunum, 23-31.

Orri Freyr Þorkelsson spilaði bara seinni hálfleikinn en var markahæstur í íslenska liðinu með sex mörk. Ómar Ingi Magnússon og Elliði Snær Viðarsson skoruðu fimm mörk sem og Haukur Þrastarson sem átti frábæra innkomu um miðjan fyrri hálfleik og átti stóran þátt í að Íslendingar sneru leiknum sér í hag.

Gísli Þorgeir Kristjánsson dældi út stoðsendingum og Ýmir Örn Gíslason var magnaður í vörninni.

Næsti leikur Íslands er gegn Ungverjalandi á þriðjudaginn klukkan 19:30. Með sigri í þeim leik tryggja Íslendingar sér sigur í riðlinum og taka tvö stig með sér í milliriðla.

Einkunnir Íslands gegn Póllandi: 

- Byrjunarlið Íslands í leiknum -

Viktor Gísli Hallgrímsson, markvörður - 3 (9 varin skot - 47:23 mín.) Átti ágætis leik, eins og gegn Ítalíu, en á eftir að sýna sparihliðarnar á þessu móti. Varði samt nokkuð vel, níu skot, eða þriðja hvert skot sem hann fékk á sig.

Bjarki Már Elísson, vinstri hornamaður - 2 (0 mörk - 30:00 mín.) Fínn í vörninni en fékk ekki úr neinu að moða í sókninni.

Elvar Örn Jónsson, vinstri skytta - 4 (2 mörk - 33:41 mín.) Sem fyrr frábær í vörninni og þeir Ýmir náðu einstaklega vel saman. Var í stóru hlutverki í hröðum sóknum Íslands í byrjun seinni hálfleiks og skoraði þá tvö mörk. Elvar er íslenska liðinu gríðarlega mikilvægur og sýnir það leik eftir leik.

Gísli Þorgeir Kristjánsson, leikstjórnandi - 5 (2 mörk - 29:56 mín.) Sá lítur vel út! Skoraði tvö mörk og gaf hvorki fleiri né færri en ellefu stoðsendingar. Stýrði sóknarleiknum frábærlega og æ betur eftir því sem leið á leikinn. Tók góðar ákvarðanir og valdi nánast alltaf besta kostinn í sókninni.

Ómar Ingi Magnússon, hægri skytta - 3 (5/4 mörk - 26:49 mín.) Hefur spilað betur en í dag. Klikkaði á þremur af fjórum skotum sínum utan af velli og átti í erfiðleikum með Milosz Walach, markvörð Póllands. Nýtti hins vegar öll fjögur vítin sín og stóð fyrir sínu í vörninni. Fékk góða hvíld í seinni hálfleik.

Óðinn Þór Ríkharðsson, hægri hornamaður - 3 (1 mark - 48:48 mín.) Skoraði eitt mark úr hraðaupphlaupi í fyrri hálfleik, úr eina færinu sem hann fékk í leiknum. Fiskaði einn góðan ruðning seinni hálfleik og stóð góða vörn.

Elliði Snær Viðarsson, línumaður - 4 (5 mörk - 35:17 mín.) Eftir erfiðan leik gegn Ítalíu sýndi Elliði úr hverju hann er gerður í dag. Skoraði þrjú af fyrstu fimm mörkum Íslands og endaði með fimm mörk úr sex skotum. Sterkur í vörninni þar fyrir utan.

Ýmir Örn Gíslason, línumaður - 5 (0 mörk - 27:55 mín.) Magnaður í vörninni, rammur af afli og það sást strax í byrjun leiks að Ýmir var í vígahug. Sterkur og hreyfanlegur og réði við allt sem Pólverjarnir buðu upp á. Hefur litið afar vel út það sem af er móti.

- Menn sem komu inn af bekknum í leiknum -

Janus Daði Smárason, leikstjórnandi - 2 (1 mark - 16:59 mín.) Átti glansleik gegn Ítalíu en það fór minna fyrir Janusi í dag enda voru aðrir leikmenn að spila vel.

Arnar Freyr Arnarsson, línumaður - 2 (1 mark - 17:35 mín.) Skoraði eitt mark úr þremur skotum. Verður að nýta færin sín betur. 

Viggó Kristjánsson, hægri skytta - 4 (3 mörk - 34:24 mín.) Klikkaði á tveimur skotum í fyrri hálfleik en spilaði mikið í þeim seinni og stóð vel fyrir sínu. Spilaði vel með Gísla og Hauki og skoraði þrjú mörk, tvö með eldsnöggum skotum og eitt eftir frábært gegnumbrot. Flottur í vörninni að vanda.  

Haukur Þrastarson, vinstri skytta - 5 (5 mörk - 22:14 mín.) Velkominn til leiks! Kom inn á um miðbik fyrri hálfleiks þegar íslenska liðið var í smá vandræðum. Byrjaði á því að kasta boltanum frá sér en lét það ekki á sig fá. Skoraði þrjú mörk í fyrri hálfleik og bætti tveimur við í seinni hálfleik. Skynsamur og yfirvegaður í sókninni. Átti eitt af eftirminnilegustu augnablikum leiksins þegar hann kastaði sér á boltann í seinni hálfleik og stal honum. Þessi útgáfa af Hauki gæti breytt öllu fyrir íslenska liðið í framhaldinu.

Orri Freyr Þorkelsson, vinstri hornamaður - 5 (6 mörk - 27:37 mín.) Spilaði seinni hálfleikinn og sýndi að hann er hornamaður í hæsta klassa. Skoraði sex mörk og var hvað eftir annað eldsnöggur fram völlinn. Er líka fínasti varnarmaður og stal boltanum tvisvar.

Björgvin Páll Gústavsson, markvörður - (7:33 mín.) Reyndi sig við eitt vítakast í seinni hálfleik og kom síðan inn á undir lokin. Varði eitt skot.

Teitur Örn Einarsson, hægri hornamaður - (0 mörk - 5:41 mín.) Kom aðeins inn á undir lokin

Andri Már Rúnarsson, leikstjórnandi - (0 mörk - 2:08 mín.) Spilaði síðustu mínúturnar og tók tvö skot sem bæði geiguðu.

Líkt og áður þá gefur íþróttadeild Vísis og Sýnar leikmönnum einkunnir fyrir frammistöðu sína.

Leikmenn fá einkunn á bilinu 1-6 með umsögn, en neðst í fréttinni má sjá hvað hver einkunn þýðir.

Útskýring á einkunnum