Real Madrid fylgir Barcelona eftir eins og skugginn

Real Madrid vann 2-0 útisigur á Valencia þar sem seinna mark liðsins kom ekki fyrr en í lokin.

Barcelona er með 58 stig og 40 mörk í plús en Real Madrid er með 57 stig og 31 mark í plús.

Bakvörðurinn Alvaro Carreras skoraði fyrra markið eftir stoðsendingu miðvarðarins Dean Huijsen á 65. mínútu. Carreras hefur bara skorað tvisvar á tímabilinu og bæði mörkin hafa komið á móti Valencia.

Kylian Mbappé skoraði seinna markið eftir stoðsendingu frá Brahim Diaz í uppbótartíma.

Mbappé er þar með búinn að skora 23 deildarmörk á leiktíðinni eða átta fleiri en næsti maður.

Real Madrid lék án þeirra Vinicius Jr, Bellingham og Rodrygo í leiknum.