Þor­steinn hættur hjá Deloitte þrátt fyrir sýknu

Þetta kemur fram í fréttatilkynningu frá Deloitte. Signý Magnúsdóttir mun gegna stöðu forstjóra tímabundið á meðan unnið er að ráðningu nýs forstjóra.

Vísir greindi frá því að Þorsteinn var ákærður fyrir kynferðisbrot og honum gefið að sök að hafa veist að ungri konu á hóteli á Suðurlandi vorið 2023. Hann lýsti yfir sakleysi sínu. Um miðjan febrúar féll dómur í málinu og var Þorsteinn alfarið sýknaður af ákærunni.

„Að undangengnu samtali Þorsteins og stjórnar hefur verið ákveðið að leiðir skilji og að Deloitte á Íslandi haldi áfram vegferð sinni undir nýrri forystu. Stjórn þakkar Þorsteini kærlega fyrir hans framlag til félagsins í gegnum árin og óskar honum velfarnaðar í framtíðinni,” er haft eftir stjórn Deloitte í tilkynninguni.

 „Eftir að hafa stigið til hliðar vegna dómsmáls sem lauk með fullri sýknu hef ég nýtt tímann til að staldra við og meta næstu skref.  Ég hef starfað hjá Deloitte í 26 ár sem er langur tími hjá einu og sama fyrirtæki.  Eftir að hafa rætt stöðu mála við mína nánustu fjölskyldu, vini og stjórn Deloitte töldum við rétt að leiðir skildu á þessum tímapunkti,” er haft eftir Þorsteini.