Al­var­leg hótun gegn orkukerfi Norður­landanna

Sænski fjölmiðillinn TV4 segir að hótunin hafi borist öllum Norðurlöndunum, þar á meðal Svíþjóð. Verið sé að rannsaka tengsl hótunarinnar við erlent ríki. Lögreglan segir fjölmiðlinum að lykilinnviðir séu vaktaðir vegna hótunarinnar.

Frá því að fyrstu fréttir voru sagðar af ógninni hafa sænsk yfirvöld gert grein fyrir því að ekki sé um aðsteðjandi ógn að ræða heldur almennan viðbúnað eftir að ráðist var á orkuinnviði Póllands í desember.

„Við höfum enga ákveðna ógn, hvorki áframhaldandi né aðsteðjandi, við orkuinnviði Svíþjóðar. Það er hins vegar almenning aukning í öryggisviðbúnaði sem leyniþjónustan hefur þegar gripið til,“ segir talsmaður sænsku lögreglunnar við ríkisútvarpið SVT.

Ebba Busch, orkumálaráðherra Svíþjóðar, segir orkuinnviði hafa lengi verið skotmark ógnana og árása. Varnarmálaráðuneytið hafi vissulega nýlega hvatt til aukinnar varkárni.

„Yfirvöld bregðast hárrétt við, axla ábyrgð, grípa til forvirkra aðgerða, vinna náið saman og sýna styrkleika Svíþjóðar,“ skrifaði Busch á samfélagsmiðil í dag.

Varnarmálaráðuneytið er sagt hafa hafi hvatt orkufyrirtæki til sérstakrar varkárni í lok síðustu viku í gegnum netþjóðaröryggismiðstöð Svíþjóðar.

„Við teljum ástæðu til að vera á varðbergi, jafnvel hér í Svíþjóð,“ segir talsmaðurinn.

Talskona sænsku almannavarnastofnunarinnar segir þarlenda ríkisútvarpinu að hún viti af hótuninni og vinni með öðrum stofnunum vegna hennar. Sænska orkustofnunin segist hafa upplýsingar um hótunina en að hún geti ekki tjáð sig um mögulega ógn.

Fréttin hefur verið uppfærð.