Elvar allt í öllu í útisigri í Íslendingslag

Ribe-Esbjerg heimsótti TTH Holstebro í Íslendingaslag og vann átta marka sigur, 39-31, á liði sem var mun ofar í töflunni.

Arnór Atlason er þjálfari TTH Holstebro en honum gekk illa að finna lausnir á móti Elvari sem endaði leikinn með átta mörk úr átta skotum og fimm stoðsendingar að auki. Hann var bæði markahæstur og stoðsendingahæstur í sínu liði.

Elvar lagði grunninn að sigri og sínum stórleik með stórbrotinni frammistöðu í fyrri hálfleik.

Elvar byrjaði leikinn frábærlega, skoraði úr fjórum fyrstu skotum sínum og kom með beinum hætti að átta af fyrstu ellefu mörkum liðsins (fjögur mörk og fjórar stoðsendingar).

Elvar var kominn með sex mörk og fjórar stoðsendingar í hálfleik og Ribe-Esbjerg fimm mörkum yfir, 21-16. Lærisveinar Arnórs hægðu á Elvari í seinni hálfleik en þá blómstruðu liðsfélagarnir.

Þetta var langþráður sigur hjá Ribe-Esbjerg eða sá fyrsti síðan í byrjun desember. Liðið hafði aðeins náð í eitt stig út úr síðustu sex deildarleikjum sínum.