Gunnar Nelson með augun á bar­daga í ár

Aðspurður hvernig staðan á honum sé þessa dagana segist Gunnar vera búinn að æfa á fullu en smá meiðsli hafa verið að plaga hann.

„Ég er enn aðeins meiddur, tognaði í hnénu fyrir stuttu. Það er eitt og annað sem kemur þegar að maður er búinn að vera í þessu svona lengi,“ segir Gunnar í samtali við íþróttadeild en hann hefur verið atvinnumaður í blönduðum bardagaíþróttum síðan árið 2007 og á mála hjá UFC, stærstu og þekktustu bardagasamtökum í heimi síðan árið 2012.

Meiðslin sem hafa verið að plaga Gunnar koma ekki til með að halda honum frá keppni í ár því Gunnar er staðráðinn í því að snúa aftur í bardagabúrið.

„Ég er í mjög góðu formi, brattur og er mjög ákveðinn í því að keppa í ár. Hvenær sem það verður nákvæmlega. Ég stefni á það.“

Gunnar barðist síðast fyrir tæpu ári síðan og tapaði þá á einróma dómaraúrskurði gegn Kevin Holland en fyrir þann bardaga hafði Gunnar unnið tvo bardaga í röð.