Verstappen segir Red Bull-bílinn ömur­legan

Önnur keppni tímabilsins í Formúlu 1 fer fram í Sjanghaí í Kína á morgun. Verstappen náði ekki í stig í sprettkeppninni í morgun og endaði í 8. sæti í tímatökunni. Hann var næstum einni sekúndu á eftir Mercedes-manninum Kimi Antonelli sem verður á ráspól á morgun.

Hljóðið var ekki gott í Verstappen eftir tímatökuna í morgun. Hann sagði að Red Bull-bíllinn væri ekkert betri en í fyrstu keppni tímabilsins í Ástralíu um síðustu helgi.

„Við breyttum öllu en þetta var nákvæmlega eins svo ég á von á því sama í keppninni,“ sagði Hollendingurinn.

„Það er ótrúlega erfitt að keyra. Það er ekkert jafnvægi. Hver einasti hringur er þrekraun og þetta er mjög erfitt. Í hvert sinn sem ég fór annan hring á dekkjasetti var þetta ömurlegt. Í hreinskilni sagt held ég að þetta verði frekar erfitt á morgun.“

Verstappen ítrekaði að breytingarnar sem gerðar hefðu verið á bílnum hefðu engu skilað.

„Áður fyrr snerum við stundum öllu á hvolf og það virkaði. En núna virkar ekkert sem er ekki gott. Ég get ekki aukið hraðann,“ sagði heimsmeistarinn fyrrverandi.

Verstappen endaði í 6. sæti í ástralska kappakstrinum um síðustu helgi. Nýi samherji hans, Isack Hadjar, þurfti þá að hætta keppni eftir tíu hringi vegna vélarbilunar.

Bein útsending frá kínverska kappakstrinum hefst á Sýn Sport Viaplay klukkan 06:30 á morgun.