Hættur með Ár­mann en tekur virkan þátt í leitinni

Karl Guðlaugsson hefur nefnilega verið bæði þjálfari meistaraflokks kvenna og formaður körfuknattleiksdeildar Ármanns. „Þannig að það er nú ekki þannig að ég hætti bara og gangi í burtu,“ segir Karl við Vísi en hann er þó sömuleiðis að hætta sem formaður og tekur Soffía Einarsdóttir við af honum. Þetta varð ljóst á aðalfundi í vikunni.

Ármann er fallinn úr Bónus-deildinni, þó að lokaumferðin sé í kvöld en þar situr liðið hjá. Tap í þríframlengdum leik gegn Hamri/Þór, næstneðsta liðinu, í Hveragerði í lok febrúar skipti þar sköpum en Ármenningar eru aðeins tveimur stigum á eftir Sunnlendingunum.

En hefði Karl haldið áfram ef Ármann hefði haldið sér uppi?

„Ég held ekki. Ég held að þetta sé ágætis tímapunktur til að söðla um. Maður er ekkert ungabarn lengur og þetta er búið að vera að gerjast í smátíma. Engin skyndiákvörðun og ég er að sama skapi ekkert að hlaupa í burtu,“ segir Karl.

„Rosalega stoltur af þeim“

Hann getur litið stoltur um öxl eftir að hafa stýrt Ármanni upp í efstu deild en þar hafði liðið síðast spilað tímabilið 1959-60, eða fyrir mörgum áratugum síðan.

„Algjörlega. Og ég er mjög ánægður með stelpurnar í vetur. Þó að við höfum ekki náð að hanga uppi þá fannst mér liðið alltaf verða betra og betra. Ég hefði viljað byrja mótið á þeim tímapunkti sem við enduðum. Þá fannst mér liðið vera tilbúið. Við þurftum náttúrulega í raun að setja saman nýtt lið og þessir Íslendingar sem að báru þetta uppi stóðu sig gríðarlega vel. Ég er rosalega stoltur af þeim,“ segir Karl.

Vonast til að dóttirin haldi áfram

Á meðal algjörra lykilmanna í liði Ármanns eru dóttir Karls, Jónína Þórdís, og Sylvía Rún Hálfdanardóttir sem tók fram skóna fyrir tímabilið. Formaðurinn Karl vonast til að halda þeim og öðrum íslenskum leikmönnum liðsins áfram:

„Það eru viðræður í gangi og ég vonast til að þær haldi allar áfram með liðinu næsta vetur.“