Fyrsta degi ÍM 50 í sundi lauk með látum

Íslandsmetið féll í 4 x 200 metra skriðsundi þar sem SH-ingar voru í miklu stuði.

Boðsundssveit Sundfélags Hafnarfjarðar skipuðu þeir Birnir Freyr Hálfdánarsson, Hólmar Grétarsson, Magnús Víðir Jónsson og Ýmir Chatenay Sölvasson. Þeir kláruðu sundið í kvöld á glænýju Íslandsmeti í greininni, 7:37,92 mín., en það er bæting á fyrra meti, um 3,13 sekúndur, sem sveit SH setti á ÍM 50 í fyrra.

Fimm sundmenn náðu lágmörkum á Evrópumeistaramótinu í 50 metra laug, sem fer fram í París dagana 10. - 16. ágúst næstkomandi, en það eru þau Birnir Freyr Hálfdánarsson (SH) í 100 metra flugsundi, Guðmundur Leó Rafnsson (ÍRB) í 200 metra baksundi, Snorri Dagur Einarsson (SH) í 100 metra bringusundi, Jóhanna Elín Guðmundsdóttir (SH) í 50 metra skriðsundi og Símon Elías Statkevicius (SH) í 50 metra skriðsundi.

Einnig voru þau Sólveig Freyja Hákonardóttir (SH) og Vala Dís Cicero (SH) með lágmörk inn á Evrópumeistaramót unglinga en það fer fram í München dagana 7. - 12. júlí næstkomandi.

Á morgun heldur fjörið í Ásvallalauginni í Hafnarfirði áfram, en þá eru helstu greinar 200 metra fjórsund karla (17:26), 50 metra flugsund kvenna (17:47) og síðan auðvitað æsispennandi boðsund í lok hluta sem hefjast 18:33, en morgundagurinn hefst kl. 09:00 á morgun með undanúrslitahluta og hefjast síðan úrslitin kl. 16:30.