Svindl og falsaðar undir­skriftir í Sviss

Á ferli sínum hefur hann leikið með FH og sem atvinnumaður i Danmörku, Frakklandi, Þýskalandi og Sviss en lengst af hjá Kristiandstad í Svíþjóð þar sem fjölskyldan hefur nú komið sér fyrir. Ólafur vann bronsið með íslenska landsliðinu árið 2010.

„Síðasta sumar fæ ég í bakið, brjósklos, og ef ekkert spilað á þessu tímabili. Ég hef verið að reyna að koma mér inn á völlinn hægt og rólega með misgóðum árangri. En af virðingu við mig og virðingu við klúbbinn þá ákvað ég að kalla þetta gott núna,“ segir Ólafur Andrés Guðmundsson í Sportpakkanum á Sýn í síðustu viku.

Ólafur segist vera mjög stoltur af ferlinum.

„Þegar maður er búinn að taka þessa ákvörðun þá fer maður að gera hana upp og láta hana malla hægt og rólega. Maður fer að hugsa ef og hefði en heilt yfir er ég stoltur af ferlinum.“

Í stóru hlutverki

Hápunkturinn á ferlinum var í Svíþjóð.

„Þegar ég kem til baka til Kristanstad 2014/15 þá tóku við fjögur fimm ár sem voru alveg frábær. Við töpuðum bara ekki leik í deildinni, vorum með frábært lið og spiluðum í Meistaradeildinni og unnum alla þessa titla. Ég var í rosalega stóru hlutverki.“

Fjölskyldan er ekki á leiðinni heim til Íslands en hún er búsett í Kristanstad.

„Konan mín er með frábæra vinnu og börnin mín í góðum skólum. Okkur líður rosalega vel hérna og höfum aðlagast vel í þessu sænska samfélagi.“

Ólafur segist ekki sjá eftir miklu á ferlinum en tíminn í Sviss með Zürich hafi verið skrautlegur.

„Það er efni í eina góða bók. Þar gerðust alls konar hlutir sem maður hefði aldrei haldið að gætu gerst í Sviss. Við erum að tala um svik og pretti, svindl og falsaðar undirskriftir og alls konar ævintýri sem maður hefði ekki trúað.“